Hatto million dollarlik to‘y ham nikoh uzoq va baxtli bo‘lishiga kafolat bermaydi. Buning yaqqol isboti sifatida ajrim bilan yakunlangan mashhurlarning eng hashamatli to‘y marosimlarini taqdim etamiz.
Bred Pitt va Jennifer Eniston
Gollivud yulduzlarining 2000-yildagi to‘yi yilning eng shov-shuvli voqeasiga aylangan edi. Garchi to‘y yopiq tarzda, OAV vakillarisiz o‘tkazilgan bo‘lsa-da, tashrif buyurgan mehmonlarning so‘zlari uning qanchalik qimmatbaho marosim bo‘lganini tasdiqlaydi.
To‘y Malibu qirg‘og‘ida, nafis gullar bilan bezatilgan bog‘da bo‘lib o‘tdi. Unda kelin Lawrence Steele brendiga mansub qo‘lda tikilgan oq libos kiydi. Pittning shaxsan o‘zi dekoratsiya va tashkiliy ishlarga bosh bo‘lgan. Bayramda mushakbozlik namoyishi 13 daqiqa davom etgan. Oradan 5 yil o‘tib, 2005-yilning yanvar oyida Bred Pitt va Jennifer Eniston munosabatlari tugaganini e’lon qildi.
Pol Makkartni va Xizer Mills
Qadimiy irlandcha qasr, mehmonlar uchun yuborilgan shaxsiy vertolyotlar va 125 ming dollarlik gullar bezagidan iborat to‘y marosimi 2002-yilda ko‘plab muhokamalarga sabab bo‘lgandi. Britaniyalik musiqachi Pol Makkartni uylangan bir oyoqli model Xizer Millsni dastlab omma unchalik yoqtirmas edi, chunki Polning rafiqasi vafot etganiga bir yil bo‘lmay boshlangan munosabatlar insonlarni shubhaga solgan.
3 million dollarlik to‘y marosimida kelin o‘zi yaratgan oq libosda, kuyov dizayni Richard Jeys tomonidan ishlangan kostyumda bo‘ldi. Taomlar musiqachining marhum rafiqasi xotirasiga bag‘ishlangan — vegetarian ovqatlardan iborat edi. Linda hayvonot mahsulotlaridan voz kechishni faol qo‘llab-quvvatlagan inson bo‘lgan.
Ammo 2006-yilda er-xotin alohida yashashni boshladi. Millsning so‘zlariga ko‘ra, Pol Makkartni giyohvand moddalarni iste’mol qilgan va rafiqasini kaltaklagan, shuning uchun u ajrashishga qaror qilgan.
Kris Hamfris va Kim Kardashyan
2011-yilda Kim Kardashyan basketbolchi, o‘zidan 4 yosh kichik Kris Hamfrisga turmushga chiqdi. Hashamatli to‘y Santa-Barbarada bo‘lib o‘tdi. Kelin marosimda 3 xil oq libosda namoyon bo‘ldi. Asal oyi esa Italiyada o‘tdi. To‘ydan 72 kun o‘tib esa Kim ajrimga ariza berdi. Mish-mishlarga ko‘ra, bu voqea Kardashyanlar oilasining yana bir piari edi. Ammo to‘y xarajatlariga ahamiyat bersangiz, bunday fikr haqiqatdan yiroqdek tuyuladi. 10 million dollarlik hashamatli to‘y, Vera Vong brendiga mansub liboslar, jahonga mashhur insonlarning marosimga taklif etilishi buning aksidan dalolat beradi. Hamfris so‘zlariga ko‘ra, mazkur to‘y uyushtirilgan shou bo‘lmagan.
Xuan Syaomin va Anjela Beybi
Xitoylik Kardashyan sifatida ma’lum bo‘lgan Anjela va aktyor Xuanning to‘y marosimi ham boshqalarnikidan qolishmaydi. Chaumet zargarlik uyiga qarashli, kelin uchun atalgan nikoh uzugi 1,5 million dollar bo‘lgan. Kelin ko‘ylak uchun Dior’ga buyurtma berilgan va libos 5 oy davomida tikilgan. Shanxaydagi kongress hollardan birida bo‘lib o‘tgan to‘yga 200 ta mehmon taklif qilingan. Ertak uslubida yasatilgan zal devorlarida Disney qasrlarini ko‘rish mumkin edi.
Xuan va Anjelaning nikohi 8 yilgina davom etdi. Ularning bir nafar o‘g‘li bor.
Shahzoda Charlz va malika Diana
“Asr to‘yi” deb ta’rif berilgan to‘y butun Britaniya va dunyo aholisi tomonidan kuzatilgan. Marosimning birgina xavfsizligi uchun 600 ming dollar sarflangan. Ledi Diana 10 ming marvarid bilan bezalgan libos va 132 marvarid qadalgan va tayyorlanishiga 5 oy ketgan tufli kiygan. Libos shleyfi 8 metr uzunlikda bo‘lgan. To‘y guli esa 2 kg og‘irlikda eng nafis va qimmatbaho gullardan yasalgan edi.
1981-yilda bo‘lib o‘tgan marosimga uch yarim ming mehmon tashrif buyurgan, ular uchun turli o‘lchamdagi 27 ta tort tayyorlandi, kechqurun esa butun Britaniya bo‘ylab yuzlab mushaklar otildi.
Ammo Charlz va Diana baxtiyor juftlik emasdi. Oilada Uilyam va Garri dunyoga kelganiga qaramay, Charlz Kamilla bilan uchrashishni davom ettirdi. Shu sababli ularning nikohiga darz ketdi.
Izoh (0)