Uels malikasining ukasi Jeyms Middltonga bir million dollar evaziga o‘z filmida bosh rolni ijro etishni taklif qilishdi. Bu haqda “Pravila jizni” nashri xabar berdi.
2011-yilda Vestminster abbatligida o‘tkazilgan, “Asr to‘yi” deya nom olgan, Kembrij gersogi va gersoginyasi to‘y marosimida Jeyms alohida nutq so‘zlagan. The Sunday Times nashri ma’lum qilishicha, Amerika prodyuserlik kompaniyasi to‘ydan keyin u bilan bog‘langan.
Keyt Middltonning ukasi “Tanishing, hayotimni saqlab qolgan it — Ella” nomli kitob muallifi sifatida tanilgan. Asar Jeymsga og‘ir depressiyani yengishda uning iti qanday yordam bergani haqidadir.
Jeyms Middltonga disleksiya (umumiy o‘rganish qobiliyatini saqlab qolgan holda o‘qish va yozish ko‘nikmalarini egallashda qiynalish) tashxisi qo‘yilgan. Shuning uchun eng badavlat, obro‘-e’tiborli kishilar taklif etilgan mamlakatdagi eng shov-shuvli ushbu to‘yda nutq so‘zlash qiyin bo‘lgan.
“Prodyuserlik kompaniyasi hatto mening oila a’zolarim ham filmda ishtirok etishga qiziqish bildiradi, deya taxmin qilishdi”, deb eslaydi Jeyms.
Jeyms Middlton bunday keng ko‘lamli tadbirda Injildan parcha o‘qishga qaror qilganini quyidagicha tushuntirdi:
“Hayotimda biror marta bunday hashamatli to‘ylarda ishtirok etmaganman. Avvaliga ushbu tadbir ko‘lami men o‘ylagandan ham ancha keng ekanligini tushunmaganman. Ammo opamning eng muhim kunida uni qo‘llab-quvvatlashim lozim edi. Keyt mendan nutq so‘zlashni iltimos qildi, men esa bunday sharafni rad eta olmasdim”, dedi Uels malikasining ukasi.
O‘tgan haftada Keyt Middlton saraton kasalligidan davolanish muolajalari tugaganidan so‘ng qirollik vazifalarini bajarishga qaytdi. Avvalroq Uels malikasi erkaklar o‘rtasida bo‘lib o‘tgan Uimbldon tennis o‘yinlari finaliga tashrif buyurgan edi.
Izoh (0)