Ko‘plab mashhurlar favqulodda holatlarning guvohi bo‘lib qoladi. Ular yong‘inni o‘chiradi, birinchi yordam ko‘rsatadi, ya’ni haqiqiy qahramonliklar qilishadi.
O‘tga chidamli Vin Dizel
“Forsaj” kino franshizasining yulduzi nafaqat kinoda, balki hayotda ham yonayotgan mashinaga kirishdan qo‘rqmaydi. 2002-yilda aktyor mototsiklida Amerika kengliklarini kezib yurganida, to‘satdan yonib ketgan avtomobilni ko‘rib qoladi, yo‘lovchilar mashinada qamalib qolgandi. Vin tezlik bilan harakatlanib, haydovchi va uning ikki farzandiga mashinadan chiqishga yordam beradi.
Benedikt Kamberbetch — talonchilar hujumi
Britaniyalik aktyor 2018-yil iyun oyida talonchilar to‘dasidan kuryerni qutqarib qolgan. Kamberbetch London bo‘ylab mashinada ketayotganida to‘rt nafar jinoyatchi velosipedda oziq-ovqat yetkazib beruvchini o‘g‘irlashga uringanini ko‘radi. Butilkani kuryerning boshiga urib sindirishganini ko‘rgan Benedikt mashinadan sakrab tushib, yordamga shoshiladi. Aktyor ortidan taksi haydovchisi ham ergashadi va mushtlashuvdan so‘ng qaroqchilar qochib ketishadi.
Keyt Uinslet muhabbatini yong‘inda topgan
2011-yil avgust oyida Keyt Uinslet ikki farzandi bilan do‘sti, milliarder Richard Brensonning shaxsiy orolida mehmon bo‘ladi. Erta tongda yashin tufayli tadbirkorning uyida yong‘in sodir bo‘ladi. Mehmonlarning yonayotgan binodan chiqib ketish uchun sanoqli daqiqalari bor edi.
Ammo Brensonning 87 yoshli onasi esa tez harakatlana olmasdi. Bunday vaziyatda Uinslet o‘zini haqiqiy qahramon sifatida tutadi: u Yevani ko‘tarib olib chiqadi, uy esa butunlay yonib ketadi.
Bunday jasoratning mukofoti, Richardning cheksiz minnatdorligidan tashqari, muhabbat bo‘ladi. Aynan o‘sha sayohat paytida Keyt Brensonning jiyani Ned Roknroll (Edvard Smit nomi bilan ham tanilgan) bilan tanishadi, unga turmushga chiqib, uchinchi farzandini dunyoga keltiradi va hozirgacha u bilan baxtli hayot kechirmoqda.
Yeva Brenson esa hodisadan so‘ng yana 10 yil umr ko‘rib, 2021-yilning yanvar oyida vafot etadi.
Shahzoda Garri polochini qutqarib qolgan
2012-yilda Braziliyaning Kampinas shahrida polo bo‘yicha xayriya o‘yini paytida shahzoda Garrining raqiblaridan biri, 41 yoshli amerikalik biznesmen o‘yinchilardan birining otiga urilib yiqilib hushidan ketadi. Shahzoda Garri zudlik bilan birinchi yordamni ko‘rsatib, uning hayotini saqlab qoladi.
Leonardo Di Kaprio ochiq dengizda bir odamni qutqargan
2020-yilda Yangi yil arafasida Leonardo Di Kaprio Karib dengizidagi o‘z yaxtasida dam olayotganida cho‘kayotgan odam haqida signal oladi: Club Med kruiz kemasi ekipajining 24 yoshli a’zosi bortdan qulab tushgandi.
Di Kaprio o‘sha paytda 11 soatdan beri suvda bo‘lgan erkakni topishga muvaffaq bo‘ladi. Aktyor o‘zini Viktor deb tanishtirgan erkakni ovqatlantirib, issiq kiyim-kechak bilan ta’minlab, qirg‘oq soqchilari qo‘liga topshiradi.
Dastin Hoffman qutqaruv xizmatini chaqiradi
Londonliklardan biri aktyor Dastin Hoffmandan minnatdor. 27 yoshli Sem Dempster Gayd-parkda sayr qilib yurganida yurak xurujiga uchraydi. Dastin Hoffman ham o‘sha yerda sayr qilib yurgan. Erkakning yiqilib hushidan ketganini ko‘rgan aktyor voqea joyiga qutqaruv xizmatini chaqirib, brigada kelguniga qadar jabrlanuvchi yonida qoladi.
Bred Pittning bir nechta qahramonliklari
Taqdir Bred Pittning e’tibori va reaksiyasini tez-tez sinab turadi. 2003-yilda u so‘nggi daqiqada yo‘lkaga chiqib ketgan avtomobil g‘ildiraklari ostida qolayotgan ayolni itarib qutqarib qolgan. 2008-yilda esa u Venetsiya kinofestivalida muxlisni xavfdan qutqarishiga to‘g‘ri kelgan.
Aktyor muxlislarga imzo berish paytida ulardan biri sirpanib, kanallarning biriga tushib ketadi. Pitt mushukdek chaqqonlik bilan o‘zini suvga otib, cho‘kayotgan kishining kiyimidan ushlab oladi. Yigitni suvdan chiqarib olishgach, Bred unga esdalik sifatida orzu qilgan dastxatini beradi.
Yaqinda “Besh soniya sukunat” filmining suratga olish maydonchasida Pittning muxlislari tasvirga olish joyi haqida bilib qolishgach, maydoncha atrofida tartibsizlik yuz beradi. Muxlislar metall to‘siqqa yopirilib, unga yaqin turgan kichkina qizchani siqib qo‘yishadi. Qizcha baqirib yuborgach, aktyor ikki nafar shaxsiy qo‘riqchisi bilan birga bolani olomon orasidan tortib chiqaradi va ota-onasiga topshiradi.
Izoh (0)