Charlz III ning sog‘lig‘i yomonlashgani haqidagi xabarlardan keyin uning boyligini oila a’zolaridan qaysi biri qancha miqdorda olishi mumkinligi haqida taxminlar ko‘payib bormoqda. Ba’zilar katta miqdorda meros olishi mumkin, boshqalari esa ozgina pulga ham qanoat qilishlari lozim.
Qirol Charlz III — qirolicha Yelizaveta II va shahzoda Filippning o‘g‘li. U 2022-yil 8-sentyabrda onasi vafotidan so‘ng 73 yoshida taxtga o‘tirdi. Avvalgi qirolichaning uzoq hukmronligi tufayli monarx taxtning eng keksa vorisi hisoblanadi.
Hayoti davomida qirol ikki marta uylandi. Uning birinchi xotini malika Diana bo‘lib, undan ikki o‘g‘il — shahzoda Uilyam va shahzoda Garri dunyoga kelgan. Uels malikasi vafotidan keyin u 2005-yilda Kamilla Parker Boulzga uylanadi. Charlz taxtga o‘tirgandan so‘ng, Kamila konsort qirolicha unvonini oldi.
Charlz qirol bo‘lganidan bir yil o‘tgach, unda prostata bezi bo‘yicha jarrohlik amaliyoti o‘tkazildi. 2024-yil yanvar oyida Bukingem saroyi ushbu protsedura davomida unga saraton tashxisi qo‘yilganligini e’lon qildi.
Bu kutilmagan holatlar qirol Charlz merosining kelajagi haqidagi savolga olib keladi. Garchi qirollik vasiyatnomalari qirol vafotidan keyin o‘nlab yillar davomida sir saqlansa-da, ichki ma’lumotlar hozirgi qirolning boyligini kimlar meros qilib olishini oshkor qilishi mumkin.
Qirolicha Kamilla
Agar Charlz vafot etsa, Kamilla uning rafiqasi sifatida birgalikdagi nikohidan orttirilgan turli aktivlar va mulklarni meros qilib olishi mumkin. Bular narxi taxminan 72 million dollar bo‘lgan Klarens Haus kabi turar joy, taxminan 39 million dollar qiymatidagi Haygrouv Haus va qirollik oilasiga tegishli boshqa mulklardir.
Bundan tashqari, qirolicha yashashi va qirollik oilasi a’zosi sifatidagi rasmiy vazifalarini bajargani uchun pul oladi. Ushbu moliyaviy yordam monarxiyani saqlash uchun ajratilgan mablag‘lar — Suveren grant hisobidan keladi. Soliq to‘lovchilar tomonidan moliyalashtiriladigan ushbu grant 2012-yilda tashkil etilgan. Bu Britaniya hukumati tomonidan hukmron monarxga rasmiy vazifalarni bajarish bilan bog‘liq xarajatlarni (xodimlarning ish haqi, sayohat xarajatlari, qirollik qarorgohlarini saqlash va boshqalar) qoplash uchun yillik to‘lovdir. Kamilla Charlz vafotidan keyin grantning asosiy oluvchilaridan biri bo‘lmasa-da, u pullarni olishda davom etadi.
Qirolicha, shuningdek, qirollik oilasi orqali o‘tadigan shaxsiy va oilaviy buyumlarini oladi. Bu buyumlar — ehtimol marhum qirolicha Yelizaveta II ning san’at asarlari va nafis zargarlik buyumlari kolleksiyasidan — uning shaxsiy mulkining bir qismiga aylanishi yoki kelajak avlodlar uchun qirollik kolleksiyasida saqlanishi mumkin.
Shahzoda Uilyam
To‘ng‘ich o‘g‘il va taxt vorisi sifatida Uilyam qirollikning katta qismiga merosxo‘r bo‘ladi. U ko‘plab qimmatli aktivlarning yangi egasi bo‘lishi mumkin, jumladan, 140 million dollarlik Balmoral qasri va 65 million dollarlik Sandringem mulki shular jumlasidan. An’anaga ko‘ra, Uilyam ham otasidan avloddan-avlodga o‘tadigan bebaho san’at asarlarini meros qilib olishi mumkin. Otasi va buvisi kabi shahzoda 1993-yildagi kelishuvga ko‘ra barcha mol-mulkiga soliq to‘lashdan ozod qilinadi.
Bundan tashqari, Uilyam katta miqdordagi aksiyalar va ko‘chmas mulk ustidan nazoratni qo‘lga kiritadi. Uning nazorati ostida bo‘ladigan qirollik mulkiga umumiy qiymati 20,5 milliard dollarga baholangan Bukingem saroyi va Vindzor qal’asi kiradi.
Uilyam, shuningdek, monarxning rasmiy vazifalari va xayriya faoliyatiga daromad keltiradigan qishloq xo‘jaligi yerlari, tijorat mulklari va investitsiyalarni o‘z ichiga olgan Lankaster gersogligini nazorat qiladi.
Nihoyat Uilyam Suveren grantning asosiy oluvchisiga aylanadi. Bu Uilyam va uning oilasi taxtga o‘tirganda turli xarajatlarini qoplashi uchun kerak bo‘ladi. Uning qancha pul olishi noma’lum, biroq otasi avvallari yiliga o‘n millionlab funt sterling olgan.
Keyt Middlton
Avvalo shahzoda Uilyamning rafiqasi sifatida Keyt konsort qirolicha unvonini oladi. Shunday qilib, uning merosi qirollik oilasidagi yangi lavozimiga mutanosib bo‘lishi kerak. Masalan, bu ko‘chmas mulk yoki vazifalarini bajarish va xayriya ishlari uchun mablag‘, shuningdek, bir qator shaxsiy aktivlar bo‘lishi mumkin. Oladigan moliyaviy yordami eriga beriladigan Suveren grantga bog‘liq bo‘ladi.
Yelizaveta II vafotidan so‘ng Keyt qirolichaning 300 donadan iborat shaxsiy zargarlik buyumlari kolleksiyasining muhim qismini meros qilib olgandi. Uning qiymati taxminan 110 million dollar. Shu bilan birga, dastlab malika Dianaga sovg‘a qilingan afsonaviy Spenser tiarasi Uilyam va Keytning qizi malika Sharlottaga o‘tgan.
Shahzoda Garri
Shahzoda Garri 2020-yilda qirollik lavozimini tark etdi, shuning uchun uning merosi akasinikidan farq qiladi. Garri otasining shaxsiy yoki oilaviy buyumlarini olishi mumkin bo‘lsa-da, mutaxassislar Charlz o‘g‘liga qo‘shimcha moliyaviy aktivlarni qoldirishga qaror qiladimi yoki yo‘qligini taxmin qila olmaydi.
Garri avvalroq otasi qirollik oilasining yuqori martabali a’zosi lavozimini tark etganidan keyin moliyaviy yordamdan mahrum qilganini e’lon qilgandi. Opra Uinfriga bergan intervyusida u hozir onasi malika Dianadan qolgan meros hisobiga yashayotganini aytgandi. Forbes ma’lumotlariga ko‘ra, o‘g‘illarining har biri Dianadan keyin taxminan 10 million dollardan olgan.
Charlz o‘z qarori bilan Garri va Meganni Buyuk Britaniyaga bo‘ysunishga majburlab, Garrini qaytarishga harakat qildi, ammo bu ish bermadi.
Shahzoda qandaydir mol-mulk olishi dargumon. In Touch nashriga ko‘ra, qirollik oilasining ba’zi a’zolari Charlzni kenja o‘g‘liga umuman meros qoldirmaslikka undagan.
Megan Markl
Megan Marklning mavqeyini hisobga olsak, uning har qanday aktiv va unvonlarga bo‘lgan huquqi so‘roq ostida. Aytishlaricha, u Yelizaveta II dan hech narsa olmagan. Qirolicha ko‘plab shov-shuvlarga sabab bo‘lgan er-xotin bilan keskin munosabatda bo‘lib, qirollik oilasi ularga ishonmas edi.
Ma’lum bo‘lishicha, Sasseks gersoginyasi unvoniga ega bo‘lishiga va qirolning nevaralari Archi va Lilibetning onasi bo‘lishiga qaramay Meganning merosi minimal bo‘ladi (agar mavjud bo‘lsa).
Malika Anna
Qirolning singlisi malika Anna oilaviy meros yoki naqd pul olishi mumkin. Biroq uning vorisligining o‘ziga xos xususiyatlariga turli omillar ta’sir qiladi.
Anna qirol Charlz vafotidan keyin o‘zining rasmiy vazifalarini bajarish uchun hukumat grantining bir qismini olish huquqiga ega bo‘lishi mumkin. Qirollik oilasining eng mehnatkash a’zolaridan biri sifatida malika Anna o‘zining keng ko‘lamli xayriya ishlari bilan mashhur.
Izoh (0)