Britaniya qirollik oilasining a’zosi, shahzoda Garrining turmush o‘rtog‘i Megan Markl o‘zining Instagram sahifasida samimiy videoni joylashtirdi. Unda Los Anjelesdagi yong‘inlar tufayli boshpanasidan ayrilgan 15 yoshli qizning orzusini qanday amalga oshirgani haqida so‘zlab berdi.
Bir necha hafta oldin Megan Markl va shahzoda Garri Kaliforniyadagi o‘rmon yong‘inlari tufayli vayronaga aylangan Altadena shahriga tashrif buyurdi. U yerda sobiq aktrisa 15 yoshli qiz va uning onasi bilan uchrashdi. Yolg‘iz ona va farzandi yashagan uy to‘liq yonib ketgan edi. Qizaloqning so‘zlariga ko‘ra, yong‘inda yo‘qotganidan afsusda bo‘lgan eng qadrli narsa — bu Billi Aylish konsertida olgan sevimli futbolkasi edi.
Megan bunday qo‘shiqchini shaxsan tanimasligini aytdi, ammo maktab o‘quvchisiga o‘sha futbolkani qaytarish uchun qo‘lidan kelganicha yordam berishini va’da qildi.
So‘ng shahzoda Garrining rafiqasi ijtimoiy tarmoqqa mazkur videoni joylashtirdi va u o‘smir qizning istagini amalga oshirgani haqida so‘zlab berdi.
Ma’lum bo‘lishicha, Sasseks gersoginyasi Billi Aylish uchun ovozli xabar yozib olgan va xonandani izlab topishni ko‘plab tanishlaridan iltimos qilgan. Billi Aylishga uning xabari yetib kelgach, u qizaloqqa yordam berishga rozi bo‘lgan. 23 yoshli qo‘shiqchi muxlisasi istagan narsani yuborgan. Sovg‘a-salomlar ichida futbolkadan tashqari, dastxat qo‘yilgan lanchboks, kiyim-kechaklar ham bor edi.
Sasseks gersoginyasi xonanda va aktyor Adam Levin hamda uning rafiqasi Behati Prinslu Billi bilan bog‘lanishiga ko‘maklashgani uchun alohida minnatdorlik bildirdi.
Izoh (0)