Shahzoda Garri va amerikalik sobiq aktrisa Megan Markl turmush qurishi ma’lum bo‘lgach, turli xil ijtimoiy mavqe va tabaqaga ega bo‘lgan ikki shaxs o‘rtasidagi nikoh ko‘pchilik tomonidan qoralandi. Chunki bo‘lajak qirolning ukasi Garri zodagonlar oilasidan uylanishi kerak edi.
Aslida, aristokratlarga yoki qirollik oilalariga kelin bo‘lgan model va aktrisalar ko‘p uchraydi.
Sofiya Hellkvist va shahzoda Karl Filipp
Sofiya Hellkvist Shvetsiya shahzodasi Karl Filipp bilan uchrashgunga qadar u Paradise Hotel realiti-shousida tanilgan model va aktrisa edi. Sofiya va shahzoda Karl Filippni uning umumiy do‘stlari restoranda tanishtirishdi. Bir necha yil o‘tgach, ular oila qurdi va hozirda juftlikning uch nafar farzandi bor. Sobiq modelning so‘zlariga ko‘ra, shahzodaning oila a’zolari uni iliq kutib olishdi va hech qachon o‘zini past his etishga yo‘l qo‘ymadi.
Oliviya Uayld va Tao Raspoli
“Doktor Haus” serialining yulduzi Oliviya Uayld italiyalik aristokrat va rejissyor Tao Ruspoliga turmushga chiqqanda endigina 18 yoshda edi. Tao Italiya shahzodasi Alessandro Raspolining o‘g‘li. Uayldga malika unvoni berilsa ham, qirollikdagi kun tartibi uning hayotiga hech qanday ta’sir qilmaganini aytadi. Afsuski, ularning nikohi 2011-yilda ajrimga yuz tutdi. Mish-mishlarga ko‘ra, ajrashishga Oliviya yosh paytida farzandli bo‘lishni xohlamagani sabab bo‘lgan.
Greys Kelli va knyaz Renye III
XX asrda aktrisa Greys Kelli va knyaz Renyening munosabatlari va nikohi turli muzokaralarga sabab bo‘lgan. Biroq ularning hayoti tashqi tomondan ertaknamo edi: Gollivudning eng go‘zal aktrisalaridan biri va Yevropa knyazligining ulug‘vor hukmdori bir-biriga ko‘ngil qo‘yishi havas qilarli edi. Greysning so‘zlariga ko‘ra, ular Kann kinofestivalida tanishib qolishgan va o‘sha kuniyoq bir-birini yoqtirib qolgan.
Aslida vaziyat ko‘ringanidek ideal emas edi: Kelli monarxning qonuniy rafiqasi bo‘lish uchun yorqin aktrisalik karyerasidan voz kechishi va Monako g‘aznasiga 2 million dollar qalin puli to‘lashi lozim bo‘lgan.
Sofi Uinklman va Frederik Vindzor
Megan va Garrining tengsiz deb ataladigan nikohi Britaniya qirollik uyida birinchi holat emas. Aktrisa Sofi 2009-yilda Kent shahzodasi Mayklning o‘g‘li Frederik Vindzorga turmushga chiqdi.
Frederik Britaniya taxtidan yiroq vakil bo‘lgani sababli aktrisa Los-Anjelesdagi faoliyatini davom ettirishi taqiqlanmadi.
Rita Heyvort va shahzoda Ali Xon
Rita Heyvort qirollik oilasiga turmushga chiqqan birinchi Gollivud aktrisalaridan biri edi. Nizoriylar yetakchisi Sulton Og‘axon III ning o‘g‘li Ali Xon “Gilda” filmida qizil sochli go‘zalni ko‘rib, uni sevib qoladi. 1949-yilda ular turmush quradi. Ammo bir necha yil o‘tgach, Rita qizi bilan AQSHga qaytib ketishdi. Ko‘p o‘tmay u ajrashish uchun ariza berdi va bunga “Xonning o‘ta shafqatsiz ekanligi” sabab bo‘lganini ta’kidladi.
Jeymi Li Kertis va Kristofer Gest
Aktrisa Jeymi Li 1984-yilda ingliz aristokratiga turmushga chiqdi. 1996-yilda Kristofer baron Xeyden-Gest unvonini meros qilib oldi va Jeymi baronessaga aylandi. Qirollik unvoniga qaramay, hozirda ularning ikkisi ham ijod bilan band. Kristofer ham aktyor va ssenariy muallifi sifatida ishlaydi va oilasi bilan AQSHda yashaydi.
Izoh (0)