O‘zlarining aktyorlik faoliyatidan tashqari insoniylik jihatlari, ezgu ishlari hamda tavozesi bilan dunyo bo‘ylab millionlab muxlislar, shu jumladan, nufuzli qirollik oilalari qalbidan joy olgan Gollivud olami yulduzlarini ko‘rib chiqamiz.
Leonardo Di Kaprio va Monako shahzodasi Albert II
Leonardo Di Kaprio nafaqat o‘zining aktyorlik mahorati, balki ekotizimga befarq emasligi bilan ham tanilgan. Shu sababli aktyor tabiatni asrash bo‘yicha faol bo‘lgan Monako shahzodasi Albert II bilan mustahkam do‘stona munosabatlar o‘rnatgan. 2015-yilda Di Kaprio atrof-muhitni muhofaza qilishga qo‘shgan hissasi uchun shahzoda tomonidan medal bilan mukofotlangan.
2021-yilda Leonardo Di Kaprio o‘zining atrof-muhitni muhofaza qilish fondi uchun tantanali kechki ziyofat uyushtirdi. Unda Irina Sheyk, Keyt Hyudson, Nina Dobrev, Orlando Blum kabi mashhurlar, jumladan, Monako shahzodasi va uning rafiqasi ishtirok etdi. Kimoshdi savdosida Albert II bilan to‘rt kunlik Arktika bo‘ylab ekspeditsiya, Elton Jonning individual konserti va “Titanik” filmidagi qutqaruv ko‘ylagi uchun raqobat bo‘lib o‘tdi. Tadbir davomida 40 million dollardan ortiq mablag‘ yig‘ildi.
Nikol Kidman va qirolicha Raniya
“Momaqaldiroq kunlari” filmi yulduzi Nikol Kidman nafaqat tomoshabinlar va hamkasblarni, balki qirollik oilasini ham latofati bilan maftun qilgan. U nafislik namunasi bo‘lgan Iordaniya qirolichasi Raniya al-Abdulloh bilan yaqin do‘stdir. Ikki go‘zal ayollar huquqlarini qo‘llab-quvvatlash uchun o‘tkazilgan xayriya kechasida tanishib qolishdi. Ular bugungi kungacha muloqot qilishda davom etmoqda. Qirolichaning o‘zi Nikol Kidman haqida doim iliq fikrlar bildiradi hamda uning mehribonligi va soddadil qalbi o‘ziga jalb qilganini e’tirof etadi.
Tom Hardi va shahzoda Garri
Tom Hardi shahzoda Garri bilan uzoq yillik do‘st bo‘lib, ular aynan qachondan beri tanish ekanligi noma’lum. Ko‘pchilik ular “Yulduzlar jangi”ning sakkizinchi epizodida tanishgan, deb taxmin qiladi. Tom Hardi hatto shahzoda Garri va Megan Marklning to‘yiga taklif qilingan. Marosimda aktyor rafiqasi, aktrisa Sharlotta Rayli bilan birga tashrif buyurgan.
Riz Uizerspun va Keyt Middlton
Aktrisa Riz Uizerspun Keyt Middlton bilan ilk bor 2011-yilda Los Anjelesda tanishgan. Malikaning o‘zi aktrisaga uchrashish taklifini bergan. Qirolllik oilasi bilan uchrashuvga taklif etilgan kun Uizerspun tinch uxlay olmaydi va ertalab soat 4 da uchrashuvga jiddiy tayyorgarlik ko‘radi. U va Keyt Middlton ko‘rishgan kun ajoyib o‘tdi va ikki ayol o‘rtasida do‘stona munosabat o‘rnatildi. Riz o‘g‘lining tug‘ilgan kunida Keyt Middlton alohida sovg‘a ham yubordi.
Tom Henks va malika Diana
Malika Diana barcha uchun Ledi Di nomi bilan tanish bo‘lib, qirollik oilasining eng ko‘zga ko‘ringan vakillaridan sanalgan. U xayriya ishlarida faol ishtirok etgan va malikaning go‘zal odobi va tabiati minglab insonlar hurmat va e’tiboriga sabab bo‘lgan. U Maykl Jekson, Freddi Merkyuri va Tom Henks bilan do‘st bo‘lgan. Ular birinchi marta 1995-yilda Londonda bo‘lib o‘tgan “Apollon 13” filmining premyerasida uchrashishgan.
Anjelina Joli va gersoginya Kamilla
Anjelina Joli xayriya ishlarida faol ishtirok etadi va BMTning ezgu niyat elchisi hisoblanadi. U insonparvarlik yordamini targ‘ib qilish uchun issiq o‘lkalarga bir necha bor tashrif buyurgan, xayriya fondlari tashkil qilgan. Bunday tadbirlar nufuzli qirollik oilasi bilan do‘stlik rishtasini bog‘lash uchun yaxshi imkoniyat bo‘ldi. Anjelina gersoginya Kamilla Parker-Boulz bilan yaqindan tanishdi. Ma’lumotlarga ko‘ra, aktrisa Kornoulga ko‘chib ketish va Lordlar palatasiga a’zo bo‘lish niyatida.
Izoh (0)