Yosh sehrgarlar maktabi va u yerdagi o‘quvchilarning sarguzashtlari haqidagi filmni ko‘rmagan yoki u haqda eshitmagan insonni topish mushkul. “Garri Potter” franshizasi bolalar va kattalar birdek miriqib tomosha qiladigan asarlardan biridir. Mazkur fantastik filmni yaratish uchun tasvirga olish jamoasi juda ko‘p ter to‘kkan. Bu safargi hikoyamiz filmga aktyorlar qanday qilib saralab olingani haqida bo‘ladi.
Deniel Redklif Garri Potterni ijro etishni istamagan
Garri Potter obrazini ijro etish uchun aktyorni topish butun kasting jarayonining eng qiyin qismi bo‘lgan. Boshqa rollar uchun deyarli barcha aktyorlar allaqachon tanlangan vaqtda Garriga da’vogarlik qiladigan bola topilmagan. So‘ng Deniel yosh Devid rolini o‘ynagan “Devid Kopperfild” filmini tasodifan tomosha qilganida rejissyor Kris Kolumb shu zahotiyoq o‘zlariga kerak bo‘lgan aktyor kim ekanligini anglab yetgan. Avvaliga Redkliffning ota-onasi bunga rozi bo‘lmagan, ularni ko‘ndirishga rejissyor uzoq vaqt uringan va oxir-oqibat masala ijobiy hal qilingan.
Emma Uotson hech qanday tajribaga ega bo‘lmagan
Emma Uotson dastlab “Garri Potter” franshizasi uchun tinglovdan bosh tortdi, lekin oxir-oqibat uni filmda ishtirok etishga ko‘ndirishgach, Uotson franshizaning bir qismi bo‘lish imkoniyati uchun kurasha boshladi. Emma darhol Germiona obrazida bo‘lishni istadi, ammo ko‘plab nomzodlarga tanlash imkoniga ega bo‘lmagan.
Birinchi tanlovdan o‘tgan minglab qizlar orasida J.K Rouling aynan unga e’tibor qaratdi va bu imkoniyat Uotsonga yana yettita tinglovdan o‘tishiga yordam berdi. Uning filmga qabul qilinmasligidan Emmaning o‘zidan ko‘proq ota-onasi qo‘rqqan.
Rupert Grint e’tibor tortish uchun rep ijro etgan
Rupert Grint bolaligidan qat’iyatli yigit bo‘lgan. Film kastingida birinchi urinish muvaffaqiyatsiz bo‘lgan, ikkinchi marta yuborgan ma’lumotlariga ham hech qanday javob kelmagan. So‘ng xafa bo‘lish va taslim bo‘lish o‘rniga u tinglovga yana bir ijod namunasini yuborgan: bu safar Grint o‘z qalamiga mansub repni ijro etdi va drama sahnasini gavdalantirgan videotasvirni namoyish etdi. Ana shundan so‘nggina film ijodkorlari Rupert Grint bilan bog‘langan va uni Ron Uizli qahramoni uchun tasdiqlagan.
Richard Xarris nabirasi iltimosi uchungina suratga tushishga rozi bo‘lgan
“Garri Potter va hikmatlar toshi” filmini suratga olish vaqtida Richard Xarris 70 yoshga borib qolgan edi. Yoshi katta bo‘lgani uchun u Dambldor obraziga taklifni uch marta rad etdi. Rejissyor unga bir necha bor qo‘ng‘iroq qilgan va har suhbatda ko‘proq gonorar taklif qilgan. Ammo Xarris uzoq davom etadigan franshizada ishlashni istamadi, chunki qarilik vaqtini tinchlikda o‘tkazishni rejalashtirgan edi. Ammo kutilmaganda uning nabirasi bu haqda bilib qoldi va bobosiga shart qo‘ydi: yo u Dambldor rolini o‘ynashga rozi bo‘ladi yoki nabira bobosi bilan gaplashishni to‘xtatadi. Richard Xarris uchun har qanday pul yoki prodyuserlarning va’dalaridan ko‘ra nabirasining so‘zlari muhimroq edi. Ko‘p o‘tmay u Dambldor roliga rozi bo‘ldi va ishga kirishdi, ammo mazkur obraz uning oxirgisi bo‘lib chiqdi.
Alan Rikman salbiy qahramonni o‘ynashni istamagan
Birinchi filmlarda Severus Sneyp antiqahramon sifatida ko‘rsatilgan. Franshizaning ilk qismlarida u hatto yozuv odamga o‘xshab ham ko‘ringan. Bu fakt dastlab Alan Rikmanni Severus rolini ijro etishdan to‘xtatgan, chunki aktyor salbiy qahramonni gavdalantirishni istamagan. Ammo uni hech qanday tinglovlarsiz filmga qabul qilishgan. “Garri Potter” da ishtirok etish imkoniyatini qo‘lda boy bermaslik lozimligini Rikmanga uning agenti ishontirgan.
Aktyor Robbi Koltreyn muallif J.K. Rouling tomonidan tanlangan
Robbi Koltreyn tinglovdan o‘tmasdan franshizaga qabul qilingan kamyob aktyorlardan biridir. Bundan tashqari, uni J.K Roulingning o‘zi tanlan olgan. Kitob muallifi aktyorda boshqalar ko‘rmagan ajoyib harakter va Hagrid obraziga xos jihatlarni ko‘rgan. Keyinchalik, Koltreynning o‘zi ham bu mavzuga to‘xtalib, “Garri Potter”dan oldin asosan yozuv odamlarni ijro etgani uchun uni qabul qilishganidan hayratda qolganini tan olgan.
Garri Oldman pul zarur bo‘lgani uchun kastingga kelgan
2002-yilga qadar aktyor “Drakula”, “Leon”, “Beshinchi element”, “Gannibal” kabi loyihalard ishtirok etgan. Garrining tan olishicha, sehrgarlar maktabi haqidagi filmga taklifni faqatgina pul uchun qabul qilgan, chunki aktyor o‘sha vaqtda iqtisodiy inqirozni boshidan o‘tkazayotgan bo‘lgan. Ammo vaqt o‘tib franshiza aktyorga shunchaki pul manbaidan ham qiziqroq va qadrliroq loyihaga aylangan.
Izoh (0)