Sehrgar bola va sehrgarlik maktabi haqidagi filmlar to‘plami barcha tomoshabinlarga manzur bo‘lgan, albatta. Ammo Garri Potter haqidagi kitoblarda ham, asar asosida ishlangan filmlarda ham shunday holatlar borki, tomoshabinda bir qancha savollar tug‘ilishi aniq.
Nima uchun sevgi damlamasidan bemalol foydalansa bo‘ladi?
Filmda Ron tasodifan Garri uchun mo‘ljallangan sevgi damlamasini ichib yuboradi. Tomoshabinlar damlamaning Ronga ta‘sir qilganini ko‘rib, kulishi mumkin. Mantiqsizlik shundaki, deyarli shunga o‘xshash ta‘sir ko‘rsatuvchi — tirik organizmni to‘liq nazorat qilish imkonini beradigan Imperius jodusini ishlatish taqiqlangan.
Bu holat kinoda ko‘rsatilmagan, lekin kitobda bor. Volan-de-Mortning onasi har kuni eriga sevgi damlamasini berib, undan nafratlanmasligi uchun ta‘sir o‘tkazgan. Natijada kichik Tom Reddl, ya’ni Volan-de-Mort tug‘ilgan. Ehtimol, u sevgi damlamasi ta‘sirida tug‘ilgani uchun haqiqiy muhabbat nima ekanini tushunolmaydi.
Sehrli dunyoda tish shifokorlari bormi?
Sehrgarlar stomatologlarga bormaydi. Masalan, Goratsiy Sliznort va Germiona o‘rtasidagi muloqotni eslash mumkin. Sliznort qizdan ota-onasi nima bilan shug‘ullanishini so‘raydi — ularning stomatologlar ekanligini bilib, u bu kasb xavfli yoki qiziqarli ekani haqida so‘raydi.
Biroq filmning ikkinchi qismida Uizlilar oilasining uyidagi soatlarni ko‘rish mumkin. Bu ixtiro oilaning barcha a‘zolarining hozir qayerdaligini ko‘rsatadi. Tomoshabinlar boshqa joylar orasida “dantist” degan joyni ham ko‘rishlari mumkin. Demak, sehrgarlar bu kasbni bilishadi.
Nima uchun suyaklarni qayta o‘stirish mumkin, lekin ko‘rish qobiliyatini tiklab bo‘lmaydi?
Sehrgarlar dunyosida tibbiyot magl (oddiy odamlar)lar dunyosiga qaraganda ancha rivojlangan. Xogvarts kasalxonasidagi Pomfri xonim va Muqaddas Mungo kasalxonasi tabiblari oddiy odamlarning xayoliga kelmagan ishlarni qila oladi.
Misol uchun, Pomfri xonim Garrining qo‘lida osongina yangi suyak o‘stiradi va sehrli suyuqlik ichgan Germionani mushukdan yana odamga aylantira oladi. Grenjer tishlarini kattalashtiradigan tavqi la’nat ta’siriga tushib qolganida ham Pomfri ularni shunday davolaydiki, Germiona yanada jozibali ko‘rinishni boshlaydi.
Bunday ishlardan so‘ng nega Garri ko‘zining xira ko‘rishiga chidab, ko‘zoynak taqib yuradi? Undan tashqari qudratli sehrgar Dambldor, Artur va Persi Uizli, Minerva Makgonagall ham ko‘zoynak taqishadi.
Agar sehrgarlar singan suyaklarni, dahshatli yaralarni tuzata olsa, nega oddiy astigmatizmni davolay olmaydi? Magllar esa kamida 1980-yildan beri bu ishni osongina amalga oshiradi.
Xogvartsga kirishdan oldin aslzoda bolalar qayerda o‘qiydi?
Hogvartsga bolalar 11 yoshga to‘lganda o‘qishga kiradi. Shu vaqtga qadar magllar oddiy maktabga borib, boshlang‘ich ta‘limni o‘sha yerda oladi. Hatto chalazotlar ham ota-onalari qarshi bo‘lmasa, o‘sha maktabda o‘qishlari mumkin. Ammo toza qondan bo‘lgan sehrgarlar haqida savol ochiq qoladi. Ular, albatta, magllar bilan birga maktabga borishlari mumkin, lekin nega ular magllar dunyosining oddiy narsalariga shunchalik hayron qolishadi?
Bundan tashqari, masalan, Uizli oilasida bo‘lgani kabi uyda ta‘lim olish imkoniyati ham bor. Ammo bunday holatda ham ta‘lim darajasi har bir o‘quvchida farq qiladi. Hogvartsda odatdagi maktab fanlari o‘qitilmaydi, shuning uchun ta‘lim masalasi ham savol tug‘diradi.
Nahotki Uizlilar shunchalik qashshoq bo‘lsa?
Filmlarning barchasida Uizlilarning moliyaviy ahvoli unchalik yaxshi emasligi doimiy ravishda ta’kidlanadi. Ular eskirgan kiyimlar kiyib, ishlatilgan darsliklardan foydalanishadi, juda kamtarona sovg‘alar berishadi. Hatto Ronning singan tayoqchasi o‘rniga yangisini olib berisholmaydi.
Biroq ularda har doim ko‘p yegulik bo‘ladi, ular buzilgan uyni qayta tiklashadi va katta to‘y tashkil qilisholadi. Albatta, Malfoylar bilan taqqoslasak, farq aniq ko‘rinadi. Lekin Uizlilarni ham kambag‘al deb bo‘lmaydi.
Nega Volan-de-Mort taktikasini o‘zgartirmaydi?
Volan-de-Mort doimo bir xil joduni qo‘llab, asosiy raqibini abadiy yo‘q qilishni istaydi. Birinchi marta u chaqaloq bilan yuzlashadi — hech narsa chiqmaydi. Keyin yana o‘sha joduni qo‘llaydi, yana biron narsa chiqmaydi. Yana bir bor urinib ko‘radi, lekin yana muvaffaqiyatsizlikka uchraydi. U shunchalik aqlli bo‘lsa ham taktikasini qayta ko‘rib chiqish va muammoni hal qilish uchun boshqa yo‘lni tanlash kerak ekanini hech qachon tushunmaydi.
Nima uchun Malfoylar oilasi magllar kiyimida yuradi?
Ma’lumki, Malfoylar oilasi — aslzoda sehrgarlar bo‘lib, o‘zlarining kelib chiqishi bilan faxrlanadi va o‘zlaridan pastlarga yuqoridan qarashadi. Ular magllar bilan hech qanday aloqada bo‘lishni xohlamaydi, ularga nafrat bilan qarashadi va bu nafratni yashirmaydi.
Biroq filmlarda Malfoylarning sehrli dunyoda bo‘lsalar ham magl kiyimlarida yurganlarini ko‘rish mumkin. Drako, albatta, o‘zining qora kostyumida juda chiroyli ko‘rinadi, lekin uning magllarga bo‘lgan nafrati qayerga ketdi?
Izoh (0)