Buyuk Britaniyada J.K.Roulingning “Garri Potter va hikmatlar toshi” asarining 1997-yilda chop etilgan birinchi nashri tashlab yuborishga bir baxya qolganda saqlanib qoldi. Kitob egalari uni eski asarlar bilan birgalikda qog‘ozlar qabul qilish punktiga topshirmoqchi bo‘lgan. Hozirda ushbu kitob kimoshdi savdosida deyarli 49 ming dollarga sotilishi mumkin.
Foto: BBC
“Garri Potter va hikmatlar toshi” asarining mazkur nusxasini NLB auksion uyida ishlaydigan Deniyel Pirs topib olgan. Kitob Briksem shahrida yashagan va yaqinda vafot etgan shaxsga tegishli bo‘lib, qarindoshlari uni chiqindiga tashlab yubormoqchi yoki qog‘oz qabul qilish punktiga topshirmoqchi bo‘lgan.
“Bu bizning eng katta topilmalarimizdan biri. Kitob saqlangan uyning egalari hayajonda, chunki ular buni umuman kutmagan edilar. Sehrga bola haqidagi ushbu asar kitoblar javonida salkam 20 yil davomida yotgan va juda yaxshi holatda saqlanib qolgan”, deydi Pirs.
Uning aytishicha, shunga o‘xshash kitoblar auksion uyiga ko‘pincha uringan va shikast yetgan holda qabul qilinadi. Ushbu kitob esa ideal holatini yo‘qotmagan.
J.K. Rouling qalamiga mansub Garri Potter kitoblarining birinchi nusxalari muntazam kimoshdi savdolarida sotiladi. Masalan, 2024-yilda uning nusxasi 55 ming dollarga, 2021-yilda esa 14 ming dollarga sotilgan.
Izoh (0)