Rossiyaning Neiry biotexnologiya laboratoriyasi Brainy nomli yangi qurilma — mohiyatan “Garri Potter” filmidagi taqsimlash shlyapasini taqdim etdi. Uning yordamida maktab o‘quvchilari kasb tanlash bo‘yicha individual tavsiyalarni olishlari mumkin.
Shlyapa elektroensefalogramma va fotopletizmogrammani o‘qiydigan elektrodlar tuzilgan maxsus bog‘ichlardan iborat. Tizim kompyuterga ulangan bo‘lib, bosh miyadagi turli funksiyalar: diqqat, charchoq, stress, dam olish, jarayonga jalb qilish va boshqa parametrlarni tahlil qiladi.
Shlpaya bosh miyani tahlil qilayotgan paytda o‘quvchi ma’lum bir fandan testni yechadi, shundan so‘ng tizim batafsil hisobotni ishlab chiqadi. O‘quvchi natijalarni kasbga yo‘naltirish bo‘yicha mutaxassis bilan muhokama qilishi mumkin.
Brainy taqsimlovchi shlyapasi o‘quvchi tomonidan bajarilgan test javoblarining to‘g‘ri yoki noto‘g‘riligini tekshiradigan boshqa kasbga yo‘naltirish tizimidan farq qiladi. U bosh miya va yurak faoliyatini tahlil qiladi: o‘smirning turli masalalarni yechishda o‘zini qanchalik qulay his qilishi, qaysi yo‘nalishda yuqori samara ko‘rsatishi va raqobatbardosh bo‘la olishini ko‘rsatib beradi.
Mazkur tizim bo‘lajak talabalarga mos universitet yoki kollejni tanlashga yordam beradi. Mutaxassislar fikriga ko‘ra, Brainy kashfiyoti yoshlarning kasbiy muvaffaqiyatga erishishga qo‘yiladigan ilk qadamlardan biridir.
Ushbu testdan 14 yoshdan 18 yoshgacha bo‘lgan barcha maktab o‘quvchilari o‘tishi mumkin. Hozirda Brainy tizimidan yetakchi universitetlar, taʼlim platformalari va Moskva hukumati foydalanmoqda.
Izoh (0)