Har birimizning hayotimiz o‘tkinchidir. Bir kun kelib qalbimizda abadiy muhrlangan, dunyoqarashimizni o‘zgartirgan va unutilmas xotiralarni hadya etgan insonlar bilan xayrlashishga majburmiz.
Quyida kino, musiqa va sport sohasiga ulkan hissa qo‘shgan, biroq o‘tgan 2024-yilda hayotdan ko‘z yumgan mashhur insonlarni yodga olamiz.
Liam Peyn
Britaniyalik xonanda, mashhur “One Direction” pop guruhining sobiq a’zosi, bastakor va gitarachi Liam Peyn 17-oktyabr kuni vafot etdi. Xonanda Argentina poytaxtidagi mehmonxonaning uchinchi qavatidan yiqilib tushdi va olingan og‘ir tan jarohatlari natijasida voqea joyida halok bo‘ldi.
Meggi Smit
Garri Potter haqidagi filmlarda professor Minerva Makgonagall roli bilan yodda qolgan britaniyalik aktrisa Meggi Smit 27-sentyabr kuni 89 yoshda olamdan o‘tdi. Mashhur aktrisa 90 yoshga to‘lishiga atigi uch oy qolgan edi.
Shennen Doerti
2024-yil 15-iyul kuni “Sehrlanganlar” seriali yulduzi Shennen Doerti 53 yoshida vafot etdi. Aktrisa 2015-yildan buyon ko‘krak saratonining 4-bosqichiga qarshi kurashib kelar edi. Oxir-oqibat saraton aktrisaning suyaklari va bosh miyasiga tarqaldi va kasallik Doertini yengdi.
Shelli Dyuvall
“Porlash” qo‘rqinchli filmining afsonaviy yulduzi Shelli Dyuval 12-iyul kuni hayotdan ko‘z yumdi. Uning o‘limiga qandli diabet kasalligining og‘ir asoratlari sabab bo‘ldi.
Roberto Kavalli
Italiyalik mashhur modelyer Roberto Kavalli 12-aprel kuni 84 yoshida vafot etdi. U uzoq davom etgan kasallikdan so‘ng Florensiyadagi uyida vafot etgan.
Kavalli charm ishlab chiqarish sanoati bilan bilan mashhur edi. Roberto 1970-yillarda o‘z kompaniyasiga asos solgan bo‘lib, Brijit Bardo, Sofi Loren, Kim Kardashyan va Jennifer Lopes kabi yulduzlar uchun obrazlar yaratgan.
O. Jey Simpson
Sobiq amerika futboli o‘yinchisi, aktyor va teleboshlovchi O. Jey Simpson Kavalli bilan bir kunda vafot etdi. U Amerika futbol yulduzi bo‘lgan. 1994-yilda rafiqasi Nikol Braun Simpson va uning do‘sti Ron Goldmanning qotilligi uchun ayblangan.
Jena Roulends
“Xotira kundaligi” filmida Elli obrazini gavdalantirgan aktrisa Jena Roulends 15-avgust kuni Kaliforniyadagi uyida yorug‘ olamni tark etdi. U umrining so‘nggi yillarida Alsgeymer kasalligidan aziyat chekib kelgan.
Ayris Apfel
O‘ziga xos va noan’anaviy uslubga ega bo‘lgan inflyuenser va moda ikonasi Ayris Apfel 2-mart kuni 103 yoshida vafot etdi. U interyer dizayneri va kolleksioner bo‘lgan va Trumendan tortib Klintongacha bo‘lgan prezidentlarning uyi va ofislari interyer dizayniga mualliflik qilgan.
Izoh (0)