Rejissyor Zak Sneyder tomonidan suratga olingan “300 spartalik” filmida bosh rolni ijro etgan Jerar Batler People nashriga bergan intervyusida tasvirga olish jarayoni qanday o‘tgani haqida so‘zlab berdi. Aktyor qayd etishicha, mazkur filmni suratga olish davomida ishtirokchilar deyarli har kuni jarohatlar olgan va kasalxonaga borishga majbur bo‘lgan.
“Jang sahnalarini suratga olish paytida ortimdagi ikkinchi darajali aktyorlarning yo burni sinar, yo ko‘ziga nayza kirib ketar yoki yiqilib, oyoq-qo‘llarini sindirib olar edi”, dedi Batler.
Jerarning filmdagi ishtiroki ham turli jarohatlarsiz o‘tmagan. U tinimsiz mashg‘ulotlardan charchagani bois og‘riq qoldiruvchi vositalarni qabul qilishga odatlanib qolgan. Shuning uchun ham 2012-yilgacha deyarli 9 yil mobaynida reabilitatsiya markaziga borishga majbur bo‘lgan. U yerda dorilarga tobelikdan davolangan.
Shuningdek, intervyu davomida Batler “Qutqaruv” filmida Pirs Brosnan bilan avariyaga uchragani haqida ham so‘zlab berdi. Unda aktyor bo‘ynini sindirib olgan edi.
“Biz katta tezlikda Range Rover mashinasida devorga urildik, uning balandligi taxminan 1 metr edi”, dedi aktyor.
Ma’lumot uchun, “300 spartalik” filmi miloddan avvalgi 480-yilda Gretsiyaning Termopil dengizi bo‘yida yashagan 300 nafar spartalik jangchining hayotini tasvirlaydi. Leonidas boshchiligidagi spartalik jangchilar o‘z mamlakatini himoya qilish uchun o‘zgacha jasorat ko‘rsatadi. Leonidas va uning jangchilari qadimiy Fors imperiyasiga qarshi kurashadi.
Film 65 million dollar byudjet bilan 456 million dollar daromad keltirgan. Loyiha dramatik va ekshn elementlari tufayli 2007-yilda MTV Movie + TV Awards’da eng yaxshi jang sahnasi uchun mukofotni qo‘lga kiritgan.
Izoh (0)