Rouen Atkinson 70 yoshda: katta odam tanasiga qamalgan bolakay — janob Binning mashhurlikka erishish yo‘li

Taniqli britaniyalik aktyor va taqlid ustasi Rouen Atkinson 6-yanvar kuni 70 yoshga to‘ldi. Faoliyati davomida u agent Jonni Inglish va Edinburg gersogidan tortib, taniqli janob Bingacha bo‘lgan ko‘plab personajlarni gavdalantirdi. Aktyorning yubileyi munosabati bilan uning mashhurlikka erishish yo‘li haqida ma’lumot beramiz.

Bo‘lajak komediyachi 1955-yil 6-yanvarda Erik Atkinson va Ella Mey Bembrij oilasida tug‘ilgan. U bolaligini Angliyaning shimoli-sharqidagi Darem okrugida joylashgan Konset shahrida o‘tkazgan. Rouen uchunchi farzand bo‘lib, u ikkita akasi bor edi — Rodni va Rupert. Atkinsonlar katta oila bo‘lishsa-da, ular hech qachon moliyaviy qiyinchiliklarni boshdan kechirmagan. Aktyorning otasi ilgari fermer bo‘lgan, o‘g‘li tug‘ilganda esa meva-sabzavot sotuvchi shirkat direktori edi. Aka- ukalar Daremdagi xususiy maktabda boshlang‘ich ta’lim oladi. Aytgancha, Buyuk Britaniyaning bo‘lajak bosh vaziri Toni Bler ham ular bilan birga o‘qigan.

Rouen to‘liq o‘rta ma’lumotni Sent Bis maktabida oladi. Aktyorning eslashicha, sport o‘quvchilar ta’lim-tarbiyasining muhim tarkibiy qismi bo‘lganligi sababli u jismonan zaif bo‘lgani uchun o‘zini kamsitilgandek his qilgan. U ayniqsa jamoaviy o‘yinlarni yoqtirmasdi. Biroq u tabiiy fanlar bo‘yicha tengdoshlaridan orqada qolmasdi. Atkinson tirishqoq talaba edi, u ba’zida o‘qituvchilarni kulgili tarzda parodiya qilishni yaxshi ko‘rardi —ko‘pchilik uning aktyorlik qobiliyati kuchliligini aytishardi. Hatto nutqidagi kamchilik ham sezilmasdi. Qolaversa, Rouen obrazga kirganda duduqlanishi o‘z-o‘zidan yo‘qolardi. Uni sinfdoshlari hech ham masxara qilishmagan, chunki u o‘zi har kimni o‘xshatib, buni qoyilmaqom tarzda qilishi mumkin edi.

Fizika va matematika bo‘yicha imtihonlarni eng yuqori ball bilan topshirgan Rouen Nyukasl universitetiga elektrotexnika bo‘yicha o‘qishga kiradi. Bakalavr darajasini tamomlab, Oksfordga yo‘l oladi. Bir paytlar otasi frontga ketgunga qadar shu yerda o‘qigan. O‘sha paytda Atkinson aktyorlik karyerasi haqida o‘ylamagandi ham. U muhandis bo‘lish niyatida qat’iy edi, hatto nomzodlik dissertatsiyasini himoya qilishni ham maqsad qilgan. Biroq taqdir uni boshqa yo‘lga boshlaydi.

Atkinson hayotidagi burilish nuqtasi uning Richard Kertis bilan tanishishi bo‘ldi. Bo‘lajak rejissyor adabiyotshunoslik fakultetida tahsil olgan va talabalarning havaskor teatr tomoshalarida qatnashardi. Ular birgalikda Oksford universiteti “Dramatik jamiyat” deb nomlangan mahalliy ijodiy guruhining yig‘ilishida ishtirok etishadi. Ko‘p o‘tmay, Kertis va Atkinson o‘zlari yoqtirgan janr — qisqa kulgili sketchlar ola boshlaydi.

Shuningdek, fransuz komediyachisi Jak Tatining “Janob Xulotning sarguzashtlari” nomli filmdagi rolidan ilhomlanib, Rouen janob Bin obrazini yaratadi. Qizig‘i shundaki, bu qahramonning sahnadagi debyuti Monrealdagi komediya festivalining fransuz bo‘limida bo‘ladi.

1978-yilda Atkinson o‘z faoliyatini Atkinson People mualliflik radioshousining boshlovchisi sifatida boshlaydi. Bolaligidan nutqida muammolarga duch kelgan odam uchun bu g‘ayrioddiy kasb edi. Biroq u o‘zining nuqsonini chiroyli tarzda yenga oldi. Bir yil o‘tgach, Rouen katta ekranda “Konservalangan kulgi” filmi bilan debyut qilib, unda uchta epizodik qahramonni o‘ynaydi. 

1983-yilda BBC afsonaviy-tarixiy “Qora ilon” sitkomini efirga uzatishni boshlaydi, unda Atkinson bosh qahramon, baxtsiz va xudbin Edinburg gersogi rolini o‘ynaydi. Serial olti fasl davom etadi va Britaniya televideniyesida sezilarli ta’sir ko‘rsatadi.

Ammo “Janob Bin” kichik ekranlarda chiqqandan keyingina haqiqiy mashhurlikka erishadi. Atkinsonning o‘zi janob Binni kattalar tanasiga qamalgan bolaga qiyoslagan. Bu personaj yovuzlik qilishga qodir emas, lekin u turli shumliklarga aralashib yuradi. Ko‘rinib turibdiki, ushbu shouning jozibasi ijrochining moslashuvchan yuz ifodalari bilan bog‘liq. Atkinsonning jilmayishi va yuz tuzilishi bu rolga juda mos kelgan. Janob Binning ajoyib muvaffaqiyatidan so‘ng, Rouen Britaniyaning eng mashhur komediya aktyorlaridan biriga aylandi.

2001-yilda Rouen ishdan qisqa tanaffus qilishga qaror qiladi va oilasi bilan Keniyaga ta’tilga ketadi. Bu sayohat u uchun janob Bin bardosh bera olmaydigan sinovga aylanishini xayoliga ham keltirmagandi. O‘sha kuni bortida aktyor va uning oilasi bo‘lgan samolyot uchuvchisi hushini yo‘qotadi. Atkinsonning rafiqasi uni hushiga keltirmoqchi bo‘lgan bir paytda, aktyor hech ikkilanmay samolyot boshqaruvini o‘z qo‘liga oladi. Albatta, u omadi kelishiga ishongan, chunki u bu sohada hech qanday ko‘nikmaga ega emasdi.

So‘nggi yillarda aktyor katta ekranda kamnamo, bunga sabablardan biri yoshi bo‘lsa, ikkinchisi 7 yil oldin u uchinchi marta ota bo‘ldi. Rouen endi oilasiga ko‘proq vaqt ajratishga qaror qilgan. Biroq yaqin kelajakda uni kinoteatrlarda yana ko‘radiganga o‘xshaymiz. O‘tgan yili Atkinson ishtirokida ikkita film suratga olingani ma’lum bo‘ldi — “Jonni Inglish”ning to‘rtinchi qismi va janob Bin haqidagi yangi badiiy film.