Режиссёр Зак Снейдер томонидан суратга олинган “300 спарталик” фильмида бош ролни ижро этган Жерар Батлер People нашрига берган интервьюсида тасвирга олиш жараёни қандай ўтгани ҳақида сўзлаб берди. Актёр қайд этишича, мазкур фильмни суратга олиш давомида иштирокчилар деярли ҳар куни жароҳатлар олган ва касалхонага боришга мажбур бўлган.
“Жанг саҳналарини суратга олиш пайтида ортимдаги иккинчи даражали актёрларнинг ё бурни синар, ё кўзига найза кириб кетар ёки йиқилиб, оёқ-қўлларини синдириб олар эди”, деди Батлер.
Жерарнинг фильмдаги иштироки ҳам турли жароҳатларсиз ўтмаган. У тинимсиз машғулотлардан чарчагани боис оғриқ қолдирувчи воситаларни қабул қилишга одатланиб қолган. Шунинг учун ҳам 2012 йилгача деярли 9 йил мобайнида реабилитация марказига боришга мажбур бўлган. У ерда дориларга тобеликдан даволанган.
Шунингдек, интервью давомида Батлер “Қутқарув” фильмида Пирс Броснан билан аварияга учрагани ҳақида ҳам сўзлаб берди. Унда актёр бўйнини синдириб олган эди.
“Биз катта тезликда Range Rover машинасида деворга урилдик, унинг баландлиги тахминан 1 метр эди”, деди актёр.
Маълумот учун, “300 спарталик” фильми милоддан аввалги 480 йилда Грециянинг Термопил денгизи бўйида яшаган 300 нафар спарталик жангчининг ҳаётини тасвирлайди. Леонидас бошчилигидаги спарталик жангчилар ўз мамлакатини ҳимоя қилиш учун ўзгача жасорат кўрсатади. Леонидас ва унинг жангчилари қадимий Форс империясига қарши курашади.
Фильм 65 миллион доллар бюджет билан 456 миллион доллар даромад келтирган. Лойиҳа драматик ва экшн элементлари туфайли 2007 йилда МTV Movie + TV Awards’да энг яхши жанг саҳнаси учун мукофотни қўлга киритган.
Изоҳ (0)