“O‘zbek qizi” filmidagi roli bilan tomoshabinlarga yaxshi tanish bo‘lgan aktrisa Aysanemxon Yusupova 2-yanvar kuni 28 yoshni qarshiladi. U baʼzi hamkasblariga o‘xshab intervyular berishni va shaxsiy hayotini ommaga oshkor etishni istamaydi. Shu boisdan ham u haqidagi maʼlumotlar juda kam.
Qoraqalpoq qizi Aysanemxon Yusupova 1997-yilning 2-yanvarida Nukus shahrida tavallud topgan. Oilasida qo‘shiqchi va sozandalar bor. Ammo u hech qachon aktrisa bo‘lishni orzu qilmagani, aksincha uning bu sohani tanlashini onasini istagani haqida aytgan.
— Onam aktrisa bo‘lishni istagan ekan. Ammo ota-onasi bunga jiddiy qarshilik qilishgani uchun boshqa sohani egallagan. Men hamisha huquqshunos bo‘lishni orzu qilganman. Maktabda yaxshi o‘qirdim, uni qizil diplomga olganim bilan esa maqtanolaman, deydi aktrisa.
Onasining sarmoyasi bilan bastakorlar Aysanemxon Yusupova uchun mualliflik qo‘shiqlarini yozishadi. U yoshligidan qo‘shiq kuylab, Nukusdagi davlat tadbirlarida ham ishtirok etgan. 8-9 sinfda o‘qiyotgan vaqtlarida “Vatan”, “Ona”, “Yoshlik” haqida qo‘shiqlar aytib, ularga kliplar suratga oldirgan. Shuning uchun ham, ekran menga unga begona bo‘lmagan.
— Gazeta o‘qishni yaxshi ko‘rardim. O‘sha vaqtdagi eng mashhur gazetalarni har hafta sotib olib, ijodkorlar bilan bo‘lgan suhbatlarni qoldirmay o‘qirdim. Menimcha, aktrisalikka bo‘lgan mehr ana shunda paydo bo‘lgan, deydi aktrisa.
2012-yilda maktabni tamomlagach, Nukus Davlat Yuridik kollejida tahsil oladi. Lekin kollejni tamomlagach, Toshkentga kelib, O‘zbekiston davlat sanʼat va madaniyat institutining “Teatr va kino aktyorligi” bo‘limiga o‘qishga topshiradi. Birinchi yili hech qanday tayyorgarliksiz kelgan Aysanemxon o‘qishga kira olmaydi.
— Imtihondan yiqilganim qattiq taʼsir qilgan, yana bir yil topshiraman, agar yana vaziyat shunday bo‘lsa, to‘g‘ri yuridik fakultetiga hujjat topshiraman deb o‘z-o‘zimga so‘z bergandim. Bir yillik tayyorgarlik qo‘l kelib, kelasi yil O‘zbekiston davlat sanʼat va madaniyat institutiga o‘qishga qabul qilinganman, deydi aktrisa.
Aysanemxon Yusupova 2020-yilda institutni tugatib, magistratura bo‘limiga o‘qishga kirib, 2022-yilda tamomlaydi.
— Institutga o‘qishga kirayotganda, “Men albatta teatrdan ishlayman” degan maqsadim bor edi. Kino aktrisasi bo‘lishni umuman xayolimga keltirmasdim. O‘qishning ilk kunida ustozlar “Syomkaga chiqmaysizlar, uchinchi kursgacha suratga olish ishlarida qatnashish mumkin emas”, deyishdi. Yuqori kurs talabalari bu gapni tasdiqlashdi. Ammo guruh rahbarim Jo‘ra Mahmudov ilk kastingda ishtirok etishimga sabab bo‘lgan. U kasting o‘tkaziladigan manzilni berib “Ishtirok eting qizim, siz albatta rolga tasdiqlanasiz”, degandi. Borsam aktrisalar tasdiqlanib bo‘lgan ekan. Havfsalam pir bo‘lib uyga qaytdim, ammo bir haftadan keyin rejissyor rolda meni ko‘rolganini va tasdiqlangan aktrisani rad etganini aytishdi. Xullas, birinchi kursdan kino va kliplarda suratga tushishni boshladim, deydi aktrisa.
Aktrisa talabalik davridayoq, 2017-yilda suratga olingan “Maftun bo‘ldim 2” filmida bosh rolni ijro etgan. Shundan so‘ng, 2018-yilda rejissyor Hilol Nasimovning “Hayot” filmida suratga tushgan. So‘ngra, “Meros” filmida bosh qahramon qiz rolini ijro qilgan. Aktrisa uni kino olamiga olib kirgan ustoz sifatida rejissyor Hilol Nasimovdan minnatdor.
“Meros” filmi Singapurda o‘tkazilgan “Singapore International Film Festival 2022” va Hindistonda o‘tkazilgan “Oltin tulpor” (Golden Horse Film Festival) xalqaro kinofestivalida “Eng yaxshi xorijiy film” nominatsiyasida g‘olib bo‘lgan. Shuningdek, Rossiyada bo‘lib o‘tgan “Zolotoy vityaz” kinoforumida “Qozoq va o‘zbek xalqlari o‘rtasidagi anʼana va munosabatlarning umumiyligi mavzusini ochib berganligi uchun” maxsus diplom bilan taqdirlangan.
Aysanemxonni xalqaro miqyosda tanitgan film, bu 2023-yilda suratga olingan rejissyor Akbar Bekturdiyevning “O‘zbek qizi” filmidir. Film nafaqat O‘zbekistonda, balki Belarus respublikasida ham juda mashhur bo‘lgan. Filmdagi roli uchun Rossiya federatsiyasida o‘tkazilgan xalqaro “Lendok” kinofestivalida “Eng yaxshi ayol roli uchun” taqdirlanadi. Shuningdek, “Toji somon” II Xalqaro kinofestivalida “Eng yaxshi ayol roli uchun” nominatsiyasida ham g‘olib chiqadi Bundan tashqari ushbu film O‘zbekistonda “Yilning eng yaxshi filmi” nominatsiyasida “oltin humo” mukofotiga sazovor bo‘ldi.
— “O‘zbek qizi”ning ikki oylik syomkasidan so‘ng stressga tushib qolganman. U hozircha faoliyatimdagi eng qiyin suratga olingan kartina hisoblanadi. Chunki suratga olish jarayonlari nafaqat jismoniy, balki ruhiy jihatdan ham kuchli bo‘lishni talab qilardi. Har kungi syomkalardan keyin ko‘kargan va shilingan yerlarimga malham surardim. Eng yomoni bir kuni suratga olinayotgan paytda qo‘limga shishi siniqlari kirib ketgan, undan qon tomchilardi. Jonim og‘riq tursa-da, jamoaning mehnatini hurmat qilib, indamay turganman. Suratga olish ishlari boshlanishidan avval sport bilan muntazam shug‘ullandim, 20 kilogrammlik miltiqni ko‘tarishga esa ko‘p marta tayyorgarlik ko‘rdim. Toshkentga qaytgach, bir oy hech qanday syomkalarga bormadim. Chunki qahramonimning ruhiyatidan chiqishim juda qiyin kechdi, deydi Aysanemxon Yusupova.
2023-yilda “Yoshlar kuni”da “Madaniyat va sanʼat fidokori” ko‘krak nishoni bilan taqdirlangan. Prezident Shavkat Mirziyoyevning 2024-yil 27-iyundagi “Yoshlar kuni munosabati bilan yurtimizning faol va tashabbuskor yosh avlod vakillaridan bir guruhini mukofotlash to‘g‘risida”gi farmoniga muvofiq, “Kelajak bunyodkori” medali bilan mukofotlangan. Ayni vaqtda Aysanemxon film va seriallarda, kliplarda suratga tushishda davom etmoqda.
Izoh (1)
Aysanam omadingzni bersin ashadiy muxlsingz