2024-yilda karyerasidagi eng yomon va yaxshi rolini o‘ynagan 6 ta aktyor

Har bir yangi yil taniqli aktyorlarning karyerasida yangi bir burilish bo‘lib, ular hayotidagi eng yaxshi rolni o‘ynab, turli mukofotlarni qo‘lga kiritishi, yoki aksincha tanqidlar ostida qolishi mumkin. Keling, 2024-yilda karyerasidagi eng yomon yoki eng yaxshi rolini o‘ynagan ba’zi aktyorlarni ko‘rib chiqamiz.

Demi Mur — eng yaxshi roli (“Substansiya”)

Shu paytgacha e’tiborga molik nominatsiyalarga loyiq ko‘rilmagan 62 yoshli Demі Mur kutilmaganda o‘zining eng yaxshi rolini ijro etdi. Garchi aktrisa qisman o‘zini (aniqrog‘i, hayotining ushbu bosqichidagi karyerasini) ijro etgan bo‘lsa ham, film tomoshabinlarga kuchli ta’sir qildi va uning aktyorlik faoliyatidagi yilning eng ta’sirli ijrolaridan biriga aylandi.

Hyu Grant — eng yaxshi roli (“Bid’atchi”)

Romantik yigit rollaridan keyin yoqimsiz obrazlarni gavdalantirgan Hyu Grant ancha qiziqarli aktyorga aylandi. “Bid’atchi” trillerida yana ham qarigan Grant o‘zining lektor obrazida tomoshabinni bir lahza ham ekrandan uzoqlashtirmaydi. Uning muloyimligi ortida qandaydir qo‘rqinchli sir yashiringanini ko‘rish va ayni vaqtda ikki qahramon bilan suhbatlashishini ko‘rgan tomoshabin filmdan ko‘z uzolmay qoladi.

Keyt Blanshett — eng yomon roli (“Borderlends”)

Tomoshabinlarning aksariyatida film treyleri chiqqandayoq savol tug‘ildi: nima uchun Keyt Blanshett kabi taniqli dramatik aktrisa bunday bema’ni kino uchun shartnoma imzoladi? Balki u ssenariyda biz bilmagan boshqa narsani ko‘rgandir?

Afsuski unday emas. Bu haqiqiy muvaffaqiyatsizlik edi. Tanqidchilar ham Blanshettning iste’dodi behuda ketganini ta’kidlashdi. Filmning o‘zi past reytingga ega bo‘ldi va juda kam daromad olib keldi. “Borderlends” nomli o‘yin ixlosmandlari esa filmni ko‘rgach hafsalasi pir bo‘ldi.

Kris Hemsvort — eng yaxshi roli (“Furiosa: Telba Maks yilnomalari”)

Kris Hemsvort Tor obrazidan keyin va nihoyat boshqa qiziqarli rol ijro etdi. Balki uning yangi qiyofasi eski obrazidan qutulishga yordam bergandir. Ishonch bilan aytish mumkinki, uning ijrosidagi Dementus yilning eng yorqin yovuz qahramonlaridan biri bo‘ldi. 

Ariana Grande — eng yaxshi roli (“Yovuz: G‘arb jodugari haqidagi ertak”)

Ko‘pchilik ushbu film butunlay muvaffaqiyatsiz chiqadi, deb o‘ylagan edi. Yosh Glinda va Elfaba haqidagi “Oz mamlakatining sehrgari” prikveli muvaffaqiyat qozondi. Ayniqsa, aktrisalar Sintiya Erivo va Ariana Grande bosh rollarni qoyilmaqom ijro etishdi.

Ariana Grande avvalo xonanda bo‘lsa ham ushbu filmda bosh qahramonlardan birini gavdalantirdi. U dastlab xudbin bo‘lib, film davomida yaxshi tomonga o‘zgaradigan qizga nisbatan tomoshabinlar mehrini uyg‘otib, kutilmaganda Glinda obrazi bilan barchani o‘ziga rom qildi.

Ledi Gaga — eng yomon roli (“Joker: ikki kishilik telbalik”)

Hatto siz ushbu filmni tomosha qilmagan bo‘lsangiz ham, birinchi qismi bilan solishtirganda u qanchalik muvaffaqiyatsiz chiqqanini eshitgan bo‘lsangiz kerak. Albatta, bu yerda muammo faqat Ledi Gaga va uning roli bilan bog‘liq emas. Ammo, boshqa tomondan, u rolini ijro etishda hech qanday ajablanarli mahorat ko‘rsatmagan. Gaga rol uchun qo‘shiq aytishni yangidan o‘rgangani, yuqori darajada tayyorgarlik ko‘rgani haqida aytgan. Biroq buning natijasini kimdir sezdimi-yo‘qmi — bu katta savol.

Dastlab bu rolga Gagani tanlash juda istiqbolli va qiziqarli ko‘ringan edi, ammo u film bilan birga g‘arq bo‘ldi. Bunga sabablardan biri rejissyor va ssenariy muallifi Todd Fillipsning Gaga qahramoniga yondashuvi edi — uni orqa planga surib qo‘ydi. Kuchli qahramon tushunarsiz tarzda tasvirlanganini ko‘rgan tomoshabinlarda haqli savol tug‘ildi: “Bo‘ldimi? Shu xolosmi?”