“Uyda yolg‘iz” (Home Alone) millionlab tomoshabinlarning Yangi yil bayrami arafasida intiqlik bilan kutadigan filmlaridan biridir. Tan olish kerakki, Makoley Kalkin ijrosidagi ayyor bola yovuz niyatli odamlarning qanday qilib ta’zirini berishini tomosha qilish odamga zavq bag‘ishlaydi. Umuman olganda, aktyorning hayoti film sujeti kabi yorqin va havas qilarlik bo‘lmagan — Kevin roli unga misli ko‘rilmagan shon-shuhrat olib keldi, ammo hayot sinovlari yosh aktyorni turli chig‘iriqlardan o‘tkazdi.
Makoleyning ruhiy tushkunlikka tushgan payti, giyohvandlikni yengib o‘tishi, yana to‘laqonli hayot kechirishga muvaffaq bo‘lgani haqida AdMe nashri tayyorlagan maqolani tarjima tariqasida e’tiboringizga havola etamiz.
Makoleyning karyerasi “Uyda yolg‘iz” komediyasidan boshlanmagan. Bundan tashqari, Kevin roli uning filmografiyasidagi birinchi asosiy roli ham emas: u ilk marta “Bak amaki” filmida rol ijro etgan. O‘shanda Kalkin 8 yosh bo‘lgan.
Uning otasi bir vaqtlar Brodveyda aktyor bo‘lgan, lekin farzandlari tug‘ilganda u allaqachon teatrdagi ishidan ketgandi. Makoleyning oilasi doimiy yetishmovchilikda yashagan: otasi mahalliy cherkovda ponomar (pravoslav cherkovida quyi darajadagi ruhoniy), onasi esa telefon operatori bo‘lib ishlagan.
Kevin Makkallister roli kastingga kelgan boshqa bolaga nasib qilishi mumkin edi. Agar u filmda rol ijro etganida, Kevin qora sochli bola bo‘lardi (Jon Maleni ismli yosh aktyor qora soch bo‘lgan), balki Makoleyning hayoti ham butunlay boshqacha bo‘lgan bo‘lardi. Ammo “Bak amaki” filmidagi tajribasi tufayli bu rolni Kalkin qo‘lga kiritdi.
“Uyda yolg‘iz” filmining birinchi qismi Makoleyga “Bosh roldagi eng yaxshi yosh aktyor” mukofoti va 110 ming dollar gonorar olib keldi. Taqqoslash uchun: filmning davomi suratga olingandan keyin aktyor 4,5 million dollar ishlab topgan.
Albatta, bularning hammasiga Makoley osonlikcha erishmagan. Aktyorning aytishicha, u shunchaki dam olishni, umrida birinchi marta yozgi ta’tilga chiqishni xohlagan. Ota-onasi bilan birga yashaydigan uyda alohida xona u yoqda tursin, hatto o‘z karavoti ham bo‘lmagan. “Dadamning qirollarga xos keng karavoti va katta ekranli televizori bor edi, men esa divanda uxlardim”, — deydi Kalkin intervyularining birida.
Shon-shuhrati eng yuqori cho‘qqiga ko‘tarilganda Kalkin dunyodagi eng mashhur bolalardan biri edi — “100 nafar eng buyuk yulduz-bolalar” ro‘yxatida u 2-o‘rinni egalladi.
Aktyorning otasi Kit Kalkin o‘g‘lini doimo nazorat ostida ushlagan. Onasi esa qolgan bolalari bilan uyda qolgan. Kit Makoley bilan suratga olish maydonchalariga borar, aynan u yosh yulduzning karyerasini boshqarardi. Makoleyning eslashicha, ba’zan shunday paytlar bo‘lganki, otasi unga tunda uxlashiga ruxsat bermagan. O‘g‘lini ertasi kuni kamera qarshisida aytishi kerak bo‘lgan jumlalarni yodlashga majburlagan.
1994-yilda Makoley o‘zining so‘nggi filmida rol o‘ynadi, keyin kinodagi ishini tashladi. U o‘rta maktabda o‘qishni davom ettirmoqchi edi, chunki ishi tufayli u ta’limdan ketishga majbur bo‘lgandi. O‘sha vaqtgacha esa, ya’ni so‘nggi 7 yil ichida u 15 ta filmda rol o‘ynadi — har qanday katta yoshli aktyor ham bunday tig‘iz ish jadvaliga dosh bera olmasdi.
“Uyda yolg‘iz”dan keyingi filmlari esa ko‘plab tanqidlarga uchradi. Ayniqsa, “Mehribon o‘g‘il” filmi omadsizlikka yuz tutdi — aktyorning hammaga tanish ampulasini o‘zgartirishga bo‘lgan urinishi tomoshabinlar tomonidan juda yomon qabul qilindi.
Makoley filmlarda suratga tushishni to‘xtatganidan ko‘p o‘tmay, ota-onasi ajrashishdi va o‘g‘lining vasiyligi bo‘yicha sud ishi boshlandi. Makoley ulardan birini tanlash o‘rniga sud orqali ikkalasining ham vasiyligidan voz kechdi. Sud jarayoni 2 yil davom etdi, natijada u ota-onasining ism-sharifini o‘ziga tegishli jamg‘armadan o‘chirib tashladi, o‘ziga moliyaviy holatini nazorat qiladigan boshqa bir mutaxassis yolladi. Kit hatto bunga norozilik ham bildirmadi va oilasi hayotidan g‘oyib bo‘ldi. Boshqa farzandlar esa onasi bilan qoldi.
Makoley voyaga yetguniga qadar qancha pul ishlaganini ham bilmas edi. Ota-onasi u shartnomalarning barcha tafsilotlaridan xabar topmasligi uchun yaxshigina harakat qilishgandi.
“18 ga to‘lganimda hisobchi meni o‘z kabinetiga chaqirdi. Oldimga bir parcha qog‘oz qo‘yib, daromadim haqida gap boshladi. Bu juda g‘alati edi: go‘yo qandaydir kichkina bola yaxshigina mehnat qilgan-u, men uning barcha pullarini noma’lum tarzda meros qilib olganga o‘xshardim”, deb eslaydi Kalkin.
Makoley birinchi marta 1998-yilda turmush qurdi. O‘sha paytda u ham, qallig‘i ham 18 yoshda edi. Uning sevgilisi Reychel Mayner ham aktrisa edi, ammo bu nikoh uzoq davom etmadi: 2000-yilda er-xotin alohida yashay boshlashdi, yana 2 yildan keyin ular rasman ajrashishdi.
2002-yilda Kalkin aktrisa Mila Kunis bilan uchrashishni boshladi. Ularning sevgisi 8 yil davom etdi, bu vaqt davomida juftlik haqiqatan ham munosabatlari haqida e’lon qilishmadi. Garchi Mila mashhur odam bilan uchrashganda munosabatlarni sir saqlash oson emasligini tan olgan bo‘lsa-da: Makoleyning muxlislari aktyorni ko‘chada boshqa bir qiz bilan ko‘rganda qo‘pol munosabatda bo‘lishdi.
“Ajralish ikkala tomon uchun ham qiyin bo‘lgan”, deb eslaydi aktrisa.
2000-yilda Kalkin aktyorlik faoliyatiga qaytishga harakat qildi, spektakl va bir nechta filmlarda ikkinchi darajali rollarda paydo bo‘ldi. Uning ba’zi ijrolari yaxshi baholandi, ammo Makoleyning iste’dodiga qaramay, hech bir film “Uyda yolg‘iz” kabi shon-shuhratga sazovor bo‘lmagan. 2000-yildan 2019-yilgacha Kalkin atigi 6 ta filmda suratga tushgan. Shundan so‘ng kino uning hayotida ikkinchi planga tushib qoldi.
2000-yillarning o‘rtalarida Makoley muammoga duch keldi va hatto sudga chaqirildi, ammo jarima va shartli qamoq jazosi bilan qutulib qoldi. Bundan biroz oldin, 2000-yilda u o‘gay singlisidan ayrildi, bir necha yil o‘tib aktyorning tug‘ishgan singlisi ham olamdan o‘tdi.
Bugungi kunda aktyor kamdan kam hollarda intervyu beradi va shaxsiy hayotini muhokama qilishni yoqtirmaydi. Albatta, uni tushunish mumkin: Makoley yoshligida mashhurlikdan bezor bo‘lgan. Shu sababli ham hayotining qorong‘i davri faqat ommaviy axborot vositalari va fotosuratlar bilangina muhokama qilinishi mumkin, o‘zi esa giyohvandligi yoki o‘tmishdagi munosabatlari haqida gapirishni istamaydi. U diqqatini hozirgi kunga qaratishga harakat qiladi, ba’zida hayotning oddiy quvonchlari haqida so‘z ochadi — sevimli uy jonivorlari yoki sevgilisi nonni qanday mazali pishirishi haqida.
2013-yilda u The Pizza Underground parodiya rok guruhiga asos solgan, biroq uning musiqiy karyerasi garchi hazil sifatida boshlangan bo‘lsa ham, yaxshi natija bermadi: shoularning birida tomoshabinlar norozi bo‘lib, undan sahnani tark etishni talab qilishgan.
2018-yilda Makoley Google Assistant reklamasida suratga tushdi: reklamada Uyda yolg‘iz” filmidagi o‘zi ijro etgan sahnalarni takrorladi. Reklama internetda shiddat bilan tarqaldi – video YouTube’da deyarli 5 million marta ko‘rildi.
Kalkin o‘zining hozirgi hayoti haqida jar solmasa-da, nihoyat uning ishlari joyida deb aytish mumkin. Makoley o‘z qo‘li bilan qurgan yo‘lakchali uyda qiz do‘sti Brenda Song bilan birga yashaydi. Ularning mushuklari ham bor. Sevishganlar bir xil pijama kiyishadi, 2021-yilda ular o‘g‘il farzandli bo‘lishdi.
“Odamlar uning qanchalik mehribon, sodiq, muloyim va aqlli ekanligini bilmaydi, deydi Brenda. Makning o‘ziga xosligi shundaki, u o‘zidan uyalmaydi. U aslida kimligini biladi va bundan yuz foiz mamnun”.
2021-yilda Kalkin “Amerikaning dahshatli hikoyalari” (American Horror Story) mashhur serialini suratga olish jarayonlarida ishtirok etdi. U 10-mavsumda bosh rollardan birini o‘ynadi va uning ijrosi hozirdanoq yuqori baholandi.
So‘nggi yillarda Makoley avvalgidek e’tibor markazida emas. Ammo yaqinda u kutilmaganda Gucci moda ko‘rgazmasida paydo bo‘lib, jamoatchilikni hayajonga soldi. U 41 yoshida ham juda yaxshi ko‘rinishda, ishlari ham yaxshi ketayotganga o‘xshaydi.
“Ha, men uyda o‘tirishni yaxshi ko‘radigan odamman, deydi u. Mening uyim 2 ta sobiq yulduz-bolalar yashaydigan joy. Birimiz hali ham qo‘limizdan kelganini qilmoqdamiz, ikkinchimiz esa hayotdan zavqlanishni xohlaydi”.
Hozirda Makoley juda baxtli hayot kechirmoqda. Albatta, u ham hech kimnikiga o‘xshamagan, sokin oilaviy baxtga loyiq.
Izoh (0)