Animator Bak Vudoll Disney’ni plagiatda ayblab kompaniyani sudga berdi. Uning so‘zlariga ko‘ra, 2016-yilda Walt Disney Animation Studios tomonidan chiqarilgan “Moana” va 2024-yilgi “Moana 2” filmlarida Vudollga tegishli “Baki” multfilmi bilan o‘xshash ko‘plab elementlar mavjud.
Mazkur multfilmlar syujeti va undagi turli detallar haqiqatan ham o‘xshash: ikkala filmda hikoyalar qadimgi Polineziya qishlog‘ida sodir bo‘ladi. Ularda xavfli sarguzashtlarni boshdan kechiradigan o‘smirlar haqida ma’lumot beriladi. Ikkala asarda ham qahramonlar hayvon ko‘rinishidagi ruhlarni uchratishadi. Shuningdek, ramziy tumor bilan bog‘liq epizod, bosh qahramonning tatuirovkali yarim ma’bud bilan uchrashuvi, tog‘ning ichida yashiringan ulkan jonzot kabi detallar ham “Baki” va “Moana” multfilmlarida birdek mavjud.
Vudollning so‘zlariga ko‘ra, o‘zining “Baki” animatsion filmi ssenariysini 2000-yilda Mandeville Films’ning sobiq ishchisi, hozirda DreamWorks Animation kompaniyasining ishlab chiqarish bo‘limi boshlig‘i Jenni Marchikka ko‘rsatgan. U Vudolldan film bilan bog‘liq materiallarni, jumladan, personajlar dizayni, hikoyalar syujeti haqida so‘ragan va go‘yoki loyihani amalga oshirish uchun qo‘shimcha ma’lumotlar kerakligiga ishontirgan. O‘sha paytda Mandeville kompaniyasi Disney bilan hamkorlik o‘rnatgan edi.
Ahamiyatli jihati shundaki, avvalroq Bak Vudoll bu haqda sudga arz ham qilgan, ammo “Moana” filmi ekranlarga chiqqaniga ancha vaqt bo‘lganidan keyin bu ishni amalga oshirgani unga pand bergan.
Vudoll Disneydan 10 milliard dollar tovon puli undirishga umid qilmoqda, deb yozadi The Hollywood Reporter. Qayd etish lozimki, “Oskar” mukofotiga nomzod bo‘lgan “Moana” 643 million dollar daromadga chiqqan, uning ikkinchi qismi esa deyarli 1 milliard dollar ishlab topgan.
Avvalroq “Moana” animatsion filmining ikkinchi qismi jahon kassalarida 221 million dollar yig‘ib, Disneyning so‘nggi besh yil ichida eng yuqori daromad keltirgan animatsion loyihasiga aylangan edi. Multfilm kassa yig‘imlari bo‘yicha yetakchi bo‘lgan 2019-yilgi “Muzyurak 2”ni ortda qoldirgan edi.
Izoh (0)