Qish faslida ushbu afsonaviy komediyani yana bir bor tomosha qilish uchun sabablar juda ko‘p. Quyida keltirilgan faktlar bilan tanishib chiqqaningizdan so‘ng, Yangi yil haqidagi mazkur oilaviy filmni yanada ko‘proq qiziqish va zavq bilan ko‘rishingiz shubhasiz.
“Bak amaki” filmi bo‘lmaganida edi, “Uyda yolg‘iz” ham suratga olinmas edi
Amerikalik rejissyor Jon Hyuz “Uyda yolg‘iz” ssenariy g‘oyasini “Bak amaki” filmini suratga olish jarayonida o‘ylab topgan. Bu filmda ham Makoley Kalkin ishtirok etgan. Undagi sahnalardan birida u eshikdagi pochta uchun tirqishdan uyga kelgan enagani so‘roq qilgan. Shunga o‘xshash epizod “Uyda yolg‘iz”da ham bor, unda Kevin uy hayvonlari uchun mo‘ljallangan kichik eshikcha orqali bezorilarning adabini beradi.
Kevin Makkallister obrazi shaxsan Makoley Kalkin uchun o‘ylab topilgan
Jon Hyuz bosh rol uchun darhol Kalkinni tanlagan. Ammo Kris Kolumb mazkur rol uchun yuzdan ortiq yosh aktyorlarni sinovdan o‘tkazgan. Oxir-oqibat Kalkin baribir eng yaxshi tanlov ekanini isbotladi va film kassa daromadlari bo‘yicha uzoq vaqt rekord natijalarni ko‘rsatdi.
“Uyda yolg‘iz” filmi Ginnes rekordlari kitobiga kiritilgan
Film ilk dam olish kunlarida 17 million dollardan ortiq daromadga chiqqan va 12 hafta davomida kassalarda birinchi o‘rinni egallab turgan. Bu ko‘rsatkich 1990-yilda suratga olingan filmlar orasida rekord bo‘lgan. Shu sababli komediya yilning eng ko‘p daromad olgan loyihasiga aylangan. Shuningdek, “Uyda yolg‘iz” 27 yil davomida komediyalar orasida eng kassabop loyiha bo‘lib kelgan.
Polshada “Uyda yolg‘iz” filmini sevib tomosha qilishadi
Polshada “Uyda yolg‘iz” har yili Rojdestvo va Yangi yil bayramlari mavsumida milliy televideniyeda namoyish etiladi. 2011-yilning o‘zida mazkur filmni 5 milliondan ortiq kishi tomosha qilgan.
Daraxt ustida qurilgan uy vaqtinchalik dekoratsiya bo‘lgan
Makkallisterlar uyi real hayotda ham mavjud bo‘lib, 2024-yil oxirida sotuvga qo‘yilgan edi. Hozirda ham mazkur uy sayyohlar uchun diqqatga sazovor joylardan biri bo‘lib kelmoqda. Ammo hovlidagi daraxt ustidagi yog‘och uycha film uchun maxsus qurilgan va keyinchalik buzib tashlangan.
Robert De Niro Garri Laym rolini rad etgan
Jon Lovits, Rober De Niro kabi aktyorlar o‘g‘ri Garri roliga nomzod bo‘lgan, ammo ular taklifni rad etgan. Jo Peshi ijrosidagi ushbu qahramon esa qoyilmaqom tarzda gavdalantirilgan.
Filmdagi tarantula o‘rgimchagi haqiqiy edi
Kevinning Marv yuziga zaharli bo‘lgan tropik o‘rgimchagi — tarantulani qo‘ygan sahnasida haqiqiy hasharotdan foydalanishgan. Aktyor Daniel Stern bu epizod faqatgina bir marta suratga olinish sharti bilan rozi bo‘lgan. Ushbu sahnada qahramon ovoz chiqarmay baqirishi lozim bo‘lgan, chunki baland shovqindan o‘rgimchak qo‘rqib ketishi va aktyorga zarar yetkazishi mumkin bo‘lgan. Marvinning qichqirgan ovozi esa keyinroq yozib olingan.
Kevinning opasi hayotda dzyudo chempioni bo‘lgan
Hillari Vulf 1994-yilda dzyudo bo‘yicha yoshlar o‘rtasida jahon chempioni bo‘lgan va AQSHning Olimpiya jamoasida qatnashgan. U “Uyda yolg‘iz 2”dan keyin kinodagi karyerasidan voz kechgan.
Kevin televizorda tomosha qilgan film soxta bo‘lgan
Kevin tomosha qilgan gangsterlar haqidagi film faqat “Uyda yolg‘iz” uchun maxsus yaratilgan va hayotda mavjud emas.
Filmda sun’iy qordan foydalanilgan, so‘ng teatrga hadya qilingan
Suratga olish jarayonida yaratilgan soxta qor Chikagodagi opera teatri uchun sovg‘a qilingan va keyinchalik boshqa filmlarda ham ishlatilgan.
Izoh (0)