Yangi yil haqidagi barcha uchun sevimli va klassikaga aylangan filmlar haqida gap ketganda ko‘pchilikning ko‘z oldida darhol “Uyda yolg‘iz” filmi gavdalanadi. Ushbu filmda aktyor Makoley Kalkin o‘zining zukko va epchil Kevin roli bilan millionlab tomoshabinlar qalbini zabt etgan. Komediya janridagi mazkur film 30 yildan ortiq vaqt davomida o‘z mashhurligini yo‘qotmay kelmoqda. Biroq kassa daromadlari natijalariga ko‘ra, 2018-yilda premyerasi bo‘lib o‘tgan “Grinch” animatsion filmi Yangi yil haqidagi barcha loyihalar orasida yetakchilik qilmoqda.
Mazkur multfilm 1957-yilda nashr etilgan “Grinch qanday qilib Rojdestvoni o‘g‘irladi?” asarining zamonaviy va moslashtirilgan variantidir. Film bosh qahramoni Grinch aftidan g‘araz niyatli, ammo kulgili va mehribon bo‘ladi. Ushbu film dunyo kassalari bo‘ylab 540 million dollardan ortiq daromad ko‘rgan.
Ammo Yangi yil haqidagi filmlarning ishlab chiqarish byudjetlari ham sezilarli darajada farq qiladi. Masalan, “Uyda yolg‘iz” filmi atigi 18 million dollarga suratga olingan bo‘lsa, “Grinch” animatsion filmining ishlab chiqarish xarajatlari 75 million dollarni tashkil qilgan.
Quyida MeriStation portaliga ko‘ra eng ko‘p daromad keltirgan Yangi yil haqidagi filmlarining ro‘yxatini taqdim etamiz:
1. “Grinch” (2018) — 540 million dollar
2. “Uyda yolg‘iz” (1990) — 476 million dollar
3. “Elvin va burunduqlar” (2007) — 365 million dollar
4. “Uyda yolg‘iz 2: Nyu-Yorkda yo‘qolib qolgan Kevin” (1992) — 359 million dollar
5. “Grinch: Rojdestvo o‘g‘risi” (2000) — 346 million dollar
Izoh (0)