2025-yil 5-yanvardan 6-yanvarga o‘tar kechasi Kaliforniyadagi The Beverly Hilton mehmonxonasida 82-sonli “Oltin globus” mukofotlarini topshirish marosimi bo‘lib o‘tdi. Yilning birinchi sovrinining kutilmagan natijalari ko‘pchilikni ajablantirdi.
Jumladan, aktrisa Demi Mur “Substansiya” filmidagi roli uchun “Myuzikl yoki komediyadagi eng yaxshi rol” nominatsiyasida g‘olib deb topildi. Bu g‘alaba uning 45 yillik faoliyatidagi birinchi e’tiborga loyiq mukofot bo‘ldi. Taqdirlash marosimida aktrisa kinodagi faoliyati bir marta bo‘lsa ham e’tirof etilishiga hech qachon ishonmaganini va mukofotni kutmaganini tan oldi.
Men biror nominatsiyada g‘alaba qozonishni umuman kutmagandim. Hozirda shunchaki shok holatidaman, zero 45 yildan ortiq vaqt davomida sahnada ishlab kelmoqdaman. Va nihoyat, bugun birinchi marta g‘alaba qozondim. Men hakamlar hay’atiga chuqur minnatdorligimni bildiraman, dedi Demi Mur.
Aktrisaning o‘ziga bo‘lgan ishonchsizligi 30 yil avval boshlangan: prodyuserlardan biri uning kameradagi roli faqatgina yengil-yelpi filmlar uchun mos ekanligini aytgach, aktrisaning kinoda muvaffaqiyat qozonishga bo‘lgan umidi so‘ngan. Hatto Mur shou-biznesni tark etishni ham rejalashtirgan, ammo bu fikridan qaytgan:
Ajoyib kunlarning birida “Substansiya” nomli yangi film ssenariysini qo‘limga oldim va taslim bo‘lishga hali erta ekanini anglab yetdim, deya qo‘shimcha qildi aktrisa.
Mur marosim bo‘lib o‘tayotgan zalga yaqin joylashgan mehmonxonadan piyoda kelganini aytib, Los Anjeles tirbandligidan qochganini aytib kuldi.
Loyihalar orasida “Brutalist” va “Emiliya Peres” filmlari eng ko‘p e’tirof va mukofotga sazovor bo‘ldi. Har bir nominatsiyada qaysi loyiha g‘olib bo‘lganini shu yerda bilib olishingiz mumkin.
Izoh (0)