Yaxshi film — qalbni davolovchi eliksir kabidir. Quyida insonga sovuq va qorong‘i oqshomlarda iliqlik baxsh etuvchi film va qisqa seriallarni taqdim etamiz.
“Ta’tillar almashganda”
Reyting IMDb — 7,10
Mashhur aktyorlar ijrosidagi ajoyib klassika. Amanda Los Anjelesda yashaydi va muharrir bo‘lib ishlaydi. Ayris esa Surrey (Janubiy-sharqiy Angliyadagi okrug)da yashaydigan jurnalist qiz. Qizlar Rojdestvo bayramida ikki haftaga uylarini almashishga qaror qilishadi — ikkalasi ham o‘zlarining muammoli sevgi munosabatlarini unutishga harakat qilmoqda, lekin muhabbat ularni baribir qay tarzda bo‘lsa ham topib boradi.
“Minari”
Reyting IMDb — 7,4
Koreys-amerikalik oila Amerika orzusi ortidan Arkanzasdagi fermaga ko‘chib o‘tadi. Yangi hayotning qiyinchiliklarida ular oilaning inkor etib bo‘lmas mustahkamligini kashf etadi va uyni haqiqiy mehr maskaniga aylantirishni o‘rganadi.
“Dunyodagi eng yomon odam”
Reyting IMDb — 7,7
Ham romantik komediya, ham drama hisoblangan ushbu film hayotining notinch davrini boshdan kechirayotgan yosh ayol Juli haqida hikoya qiladi. Juli o‘z yo‘lini topish uchun kurashadi, uning istaklari va boshqalarning umidlari o‘rtasida ziddiyat mavjud. Oxir-oqibat u o‘zini anglab yetadi — hayotda o‘z o‘rnini topadi. Bu film insonga o‘zini qabul qilishni o‘rgatadi.
“Barcha quvonchli joylar”
Reyting IMDb — 6,6
Mazkur filmda Violet va Teodor ismli o‘smirlar hayoti haqida hikoya qilinadi. Ularning uchrashuvi qahramonlar hayotini butunlay o‘zgartirib yuboradi. O‘smirlar o‘tmishdagi ruhiy va jismoniy jarohatlar bilan kurashar ekan, sevgining shifobaxsh kuchini kashf etadi.
“Maxluq ovozi”
Reyting IMDb —7,4
“Maxluq ovozi” — 12 yoshli qahramon tomonidan hikoya qilinadigan fantastik psixologik drama. Mazkur film onasi og‘ir kasal bo‘lib qolgan Konor ismli bola haqida. Bola qiyinchilikni boshdan kechirayotgan bir paytda aqlbovar qilmas hodisa sodir bo‘ladi. Hovlidagi keksa daraxt jonlanib, ulkan maxluqqa aylanadi. Kechalari u Konorga butun dunyo vayron bo‘lsa ham, umidsizlikka tushmaslik va o‘zida kuch topa olish mumkinligini o‘rgatadigan hikoyalar aytib beradi.
“Ummondagi yorug‘lik”
Reyting IMDb — 7,2
Yangi turmush qurgan yoshlar — Tom va Izabell uzoq orolga ko‘chib o‘tadi. Tom u yerda mayoq nazoratchisi bo‘lib ishlaydi. Bir kuni qirg‘oqqa ichida chaqaloq bo‘lgan qayiq kelib qoladi. Er-xotin chaqaloqni o‘z qizi kabi tarbiyalashga qaror qilishadi. Lekin ular hayotlari qanchalik o‘zgarib ketishini tasavvur qilishmagandi.
“Bir kuni”
Reyting IMDb – 8,4
Ushbu serialda bir qarashda odatiy sevgi hikoyasini ko‘rish mumkin. Yigit boy, qiz esa oddiy oiladan, lekin ularning muhabbati barcha to‘siqlarni yengadi. Faqatgina Dekster va Emma har safar uchrashganida o‘z tuyg‘ularini izhor qilolmaydi. Ular baxtga erishish imkoniyatini yo‘qotgandek go‘yo. Taqdir sevishganlarga kulib boqadimi yoki ular yolg‘izlikka mahkummi?
“Sen bilan uchrashguncha”
Reyting IMDb – 7,4
Luiza ishini yo‘qotadi. O‘ziga mos ish qidirayotganda unga boy, ammo falaj yigitni parvarish qilish taklif etiladi. Vazifalar oddiy: unga hamrohlik qilish, choy tayyorlash, ovqatlantirish va dori-darmonlar berish. Avvaliga yigit o‘zini beparvo va qo‘pol tutadi, ammo Luizaning samimiyligi tufayli uning hayotga qiziqishi asta-sekin qaytadi.
“Oilaviy reja”
Reyting IMDb – 8,5
Yangi koreys mini-serialida superqobiliyatga ega bir guruh odamlar oddiy oila sifatida niqoblanadi. Bu oila maktabdagi oddiy bezorilikdan tortib, katta jinoyatlargacha qarshi kurashishi kerak. Dunyodagi eng xavfli va eng yaxshi ona rolida esa — Pe Du Na.
Izoh (0)