Biz kinoda turli kasbdagi odamlar moda jurnalining muqovasidagiga o‘xshab ko‘rinishga o‘rganib qolganmiz: zamonaviy, nafis va chiroyli kiyimlarda. Biroq real hayot bunday emas. Ba’zan kinematograflar ideal obraz yaratib, real voqelikni ancha bo‘rttirib tasvirlaydi. Bularning hammasi tomoshabinda mutlaqo noto‘g‘ri tasavvur hosil bo‘lishiga olib keladi.
Arxeologlar
“Lara Kroft” filmida arxeolog Lara vaqtni poyga, qaroqchilar va xavfli sarguzashtlar bilan o‘tkazadigan jangari qahramon sifatida tasvirlangan. Uning qaddi-qomati baland, kiyimlari o‘ziga yopishib turgan va har qanday vaziyatda mukammal pardoz-andozda bo‘ladi.
Aslida, arxeologlar ko‘p vaqtlarini sermashaqqat ishlarga: hujjatlarni o‘rganishga, chang va iflos sharoitlarda qazish ishlariga sarflaydi. Ko‘pincha monoton va fizik jihatdan murakkab vazifalarga duch keladi.
Biologlar
Biologlar organizmlar yoki viruslar bilan ishlaydigan filmlarda qahramonlar odatda steril va vizual jihatdan shinam laboratoriyalarda ishlaydi, ular haqiqiy ilmiy uskunalardan ko‘ra ko‘proq dekoratsiyaga o‘xshaydigan turli xil kolbalar va probirkalarga to‘la bo‘ladi. Ko‘pincha ilmiy xodimlar sochlari yoyilgan holda xalat yoki niqobsiz ishlaydi.
Aslida esa laboratoriyalar ancha oddiy bo‘lib, xavfsizlikning qat’iy protokollariga rioya qilish esa olimning kundalik ishining majburiy elementidir.
Fizik olimlar
“Butun dunyo ham kamlik qiladi” filmida aktrisa Deniz Richards ko‘p vaqtini kalta shorti va tor maykada o‘tkazadigan fizik olim doktor Kristmas Jons rolini ijro etadi.
Bu obraz haqiqatdan juda yiroq: fiziklar, ayniqsa tor sohada ishlaydigan mutaxassislar vaqtlarini maxsus himoya kiyimlari va qat’iy intizom talab qilinadigan laboratoriyalarda yoki murakkab inshootlarda o‘tkazadi. Haqiqiy olimlar filmda ko‘rsatilganidek dunyoni deyarli yolg‘iz o‘zlari qutqarish bilan shug‘ullanmaydi, aksincha, ular mashaqqatli tadqiqotlar va murakkab muhandislik loyihalari ustida ishlashadi.
Kutubxonachilar
“Mumiyo” filmida kutubxonachi nafis, zamonaviy va juda jozibador qiz sifatida tasvirlangan. Uning tashqi ko‘rinishi — jingalak sochlari, nafis ko‘ylagi va nazokatli harakatlari bu kasbning romantiklashtirilgan obrazini yaratadi.
Aslida kutubxonachilar odatda kitoblarni tizimlash, ilmiy tadqiqot ishlari va axborot taqdim etish bilan shug‘ullanadi, ularning tashqi ko‘rinishi esa kinematografik qoliplarga qaraganda ancha oddiyroq bo‘ladi.
Kotibalar
Filmlarda kotibalar ko‘pincha yosh, jozibador qizlar sifatida tasvirlanadi. Ular bir vaqtning o‘zida o‘nlab vazifalarni bajarayotgandek ko‘rsatiladi: telefonda gaplashish, jadval tuzish, hujjatlar bilan yugurib yurish va doimo tartibsiz sharoitida ishlash. Ularning ish stoli odatda qog‘ozlar bilan to‘lib-toshgan bo‘ladi, tashqi ko‘rinishi esa har doim benuqson: mukammal pardoz, zamonaviy kiyim va baland poshnali tufli.
Aslida esa kotibalik yuqori darajadagi diqqat-e’tibor, tizimlilik va stressga chidamlilikni talab qiladi. Bunday tartibsizlikka hech kim uzoq vaqt dosh berolmasdi. Doimiy yugurib yurish va zo‘riqishda har qanday pardoz buzilib ketardi. Professional ofislardagi qat’iy kiyinish qoidalari esa haddan tashqari yorqin yoki yengil-yelpi ko‘rinishni man etadi.
Jurnalistlar
“Katta shahar” serialida Kerri Bredshou zamonaviy jurnalist sifatida tasvirlangan. Uning garderobida dizaynerlik liboslar, juda qimmat poyabzal va aksessuarlar bo‘ladi. Jurnalistlik esa ko‘proq ziyofat va uchrashuvlar uchun bemalol vaqt topiladigan yoqimli sevimli mashg‘ulot sifatida ko‘rsatiladi.
Haqiqatda esa jurnalistlar, ayniqsa, tahririyatlarda ishlovchilar ko‘pincha stressga va kompyuterda uzoq soat ishlashga duch kelishadi. Ularning kiyimlari ham odatda qulay va oddiy bo‘ladi.
Shifokorlar
Film va seriallarda shifokorlar ko‘pincha ochiq kiyingan, sochlari yoyilgan va noz-karashmali, zamonaviy, jozibali ayol sifatida tasvirlanadi. Bunday obrazlar odatda bo‘rttirib ko‘rsatiladi.
Aslida esa shifokorlar, ayniqsa, ish bilan band bo‘lgan kunlarda, katta ish yuklamasiga duch kelishadi va shunchalik charchashadiki, hatto tabassum qilishga ham vaqt va kuch qolmaydi, noz-karashma haqida gapirmasa ham bo‘ladi. Bundan tashqari, qat’iy kiyinish qoidalari va shifokorlik odobi professional muhitda ochiq kiyinish yoki nomaqbul xatti-harakatlarni istisno qiladi.
Izoh (0)