Vladimir Zelenskiy AQSh, Yevropa Ittifoqi va Buyuk Britaniya G‘arb qo‘shinlarini Ukrainaga joylashtirish masalasida hozircha bir qarorga kelmaganini aytdi.
"Men hozir buni ochiq muhokama qila olmayman... bu masala bo'yicha qarorlar yo'q. Qandaydir istak bor, mening tushunishim bo‘yicha, siyosiy iroda mavjud... Ammo Yevropa Ittifoqi va AQSH tomonidan qaror qabul qilinmaguncha, tafsilotlarni baham ko'ra olmayman. Shuningdek, Buyuk Britaniya ham biz bilan birga ekaniga ishonamiz”, dedi Zelenskiy.
Avvalroq Reuters o‘z nomini oshkor etmagan yevropalik mulozimga tayanib, Yevropa Ittifoqida mojaro tugaganidan keyin Ukrainaga xorijiy qo‘shinlarni yuborish bo‘yicha konsensus yo‘qligi va shu munosabat bilan 5-8 davlatdan iborat koalitsiya tuzish imkoniyati ko'rib chiqilayotgani haqida xabar bergan edi. Agentlik maʼlumotlariga ko‘ra, bu kuchlarning tayanchini Yevropaning Fransiya, Germaniya, Italiya, Polsha va Buyuk Britaniya kabi yirik davlatlari tashkil qilishi mumkin va bu maqsadlar uchun 100 mingga yaqin askar kerak bo‘ladi.
Monde gazetasi o‘z manbalariga tayanib, Fransiya va Buyuk Britaniya Ukrainaga G‘arb qo‘shinlarini kiritish ehtimoli bo‘yicha munozaralarni qayta boshlagani haqida xabar berdi. OAV xabarlariga ko‘ra, Parij va London Ukraina bo‘yicha koalitsiyaga rahbarlik qilish imkoniyatini istisno etmayapti.
Rossiya Tashqi razvedka xizmati matbuot byurosi avvalroq G‘arb Ukrainaning jangovar tayyorgarligini tiklash uchun mamlakatda 100 mingga yaqin tinchlikparvar kontingentini joylashtirishi haqida xabar bergan edi. Tashqi razvedka xizmati bu Ukrainaning amalda bosib olinishini anglatadi, deb hisoblaydi.
O‘z navbatida, Rossiya prezidenti matbuot kotibi Dmitriy Peskov tinchlikparvar kuchlarni yuborish faqat maʼlum bir mojaro taraflarining roziligi bilan amalga oshirilishini taʼkidladi.
Izoh (0)