NATOning sobiq bosh kotibi Yens Stoltenberg Ukrainadan vaqtinchalik hududiy imtiyozlar Rossiya bilan urushni tugatish yo‘lidagi qadam bo‘lishi mumkinligini qayd etdi.
Uning fikricha, bunday chora Kiyev bu hududlarni abadiy tark etishini anglatmaydi.
“Evaziga Ukraina xavfsizlik kafolatlarini olishi muhim. Bu NATO a’zoligi yoki ukrainaliklarni qurollantirish va qo‘llab-quvvatlash bo‘yicha boshqa choralar bo‘lishi mumkin”, dedi Stoltenberg.
Stoltenberg Zelenskiyning o‘t ochishni to‘xtatgan taqdirda Rossiyaga hech qanday hududni bermaslik talabini qo‘llab-quvvatladi, biroq buni amalga oshirish qiyinligini ta’kidladi.
Avvalroq Zelenskiy agar Ukraina NATOga qabul qilinsa, Kiyev Rossiya bilan urushning “qaynoq fazasini” tugatishga rozi bo‘lgan edi.
Uning ta’kidlashicha, boy berilgan hududlardan voz kechish haqida gap ketmayapti. Zelenskiyning so‘zlariga ko‘ra, NATO Ukrainani anneksiya qilingan Qrimni o‘z ichiga olgan xalqaro tan olingan chegaralari doirasida taklif qilishi kerak.
“Ishg‘ol qilingan hududlarni keyinroq, diplomatik yo‘l bilan qaytarish mumkin. Agar biz urushning qizg‘in bosqichini to‘xtatmoqchi bo‘lsak, bizning nazoratimiz ostida bo‘lgan Ukraina hududini NATO soyaboni ostiga olishimiz kerak”, deydi u.
Uning fikricha, buni tezda amalga oshirish kerak. Alyansga a’zolik Rossiya prezidenti Vladimir Putinning “qaytmasligini” ta’minlaydi. Ukraina yetakchisining ta’kidlashicha, agar urush NATO xavfsizlik kafolatisiz shunchaki to‘xtatib qo‘yilsa, u tez orada yana qayta boshlanadi.
Shu bilan birga, FT manbalari “hududlar evaziga NATO a’zoligi” g‘oyasini amalga oshirishda qiyinchiliklar mavjudligini qayd etdi. Bu qiyinchiliklar ham Rossiyaning Ukrainaning alyansga a’zo bo‘lishiga qat’iyan qarshi ekanligi, ham AQSH va blokning boshqa davlatlari bunga tayyormi-yo‘qmi degan masalada aniq tushunchaning yo‘qligi tufayli yuzaga kelmoqda.
Iyun oyida Putin birinchi marta Kiyev bilan tinchlik muzokaralarini boshlash shartlarini ochiqlagan edi. Bu shartlar orasida NATO va boshqa harbiy ittifoqlarga a’zo bo‘lishdan voz kechish, shuningdek, Ukraina armiyasini Lugansk, Donetsk, Zaporojye va Xerson viloyatlarining ma’muriy chegaralaridan olib chiqish hamda ushbu hududlar ustidan suverenitetni yo‘qotganligini tan olish mavjud. Zelenskiy bu talablarni navbatdagi ultimatum deb baholab, ularni muhokama qilishni rad etgan.
Izoh (0)