Владимир Зеленский АҚШ, Европа Иттифоқи ва Буюк Британия Ғарб қўшинларини Украинага жойлаштириш масаласида ҳозирча бир қарорга келмаганини айтди.
"Мен ҳозир буни очиқ муҳокама қила олмайман... бу масала бўйича қарорлар йўқ. Қандайдир истак бор, менинг тушунишим бўйича, сиёсий ирода мавжуд... Аммо Европа Иттифоқи ва АҚШ томонидан қарор қабул қилинмагунча, тафсилотларни баҳам кўра олмайман. Шунингдек, Буюк Британия ҳам биз билан бирга эканига ишонамиз”, деди Зеленский.
Аввалроқ Reuters ўз номини ошкор этмаган европалик мулозимга таяниб, Европа Иттифоқида можаро тугаганидан кейин Украинага хорижий қўшинларни юбориш бўйича консенсус йўқлиги ва шу муносабат билан 5-8 давлатдан иборат коалиция тузиш имконияти кўриб чиқилаётгани ҳақида хабар берган эди. Агентлик маълумотларига кўра, бу кучларнинг таянчини Европанинг Франция, Германия, Италия, Польша ва Буюк Британия каби йирик давлатлари ташкил қилиши мумкин ва бу мақсадлар учун 100 мингга яқин аскар керак бўлади.
Монде газетаси ўз манбаларига таяниб, Франция ва Буюк Британия Украинага Ғарб қўшинларини киритиш эҳтимоли бўйича мунозараларни қайта бошлагани ҳақида хабар берди. ОАВ хабарларига кўра, Париж ва Лондон Украина бўйича коалицияга раҳбарлик қилиш имкониятини истисно этмаяпти.
Россия Ташқи разведка хизмати матбуот бюроси аввалроқ Ғарб Украинанинг жанговар тайёргарлигини тиклаш учун мамлакатда 100 мингга яқин тинчликпарвар контингентини жойлаштириши ҳақида хабар берган эди. Ташқи разведка хизмати бу Украинанинг амалда босиб олинишини англатади, деб ҳисоблайди.
Ўз навбатида, Россия президенти матбуот котиби Дмитрий Песков тинчликпарвар кучларни юбориш фақат маълум бир можаро тарафларининг розилиги билан амалга оширилишини таъкидлади.
Изоҳ (0)