Ukraina prezidenti Vladimir Zelenskiyning maslahatchisi Dmitriy Litvin Vengriya bosh vaziri Viktor Orbanning Rojdestvo bayrami arafasida Rossiya bilan o‘t ochishni to‘xtatish va keng ko‘lamli asirlar almashinuvini amalga oshirish haqidagi taklifiga qarshi chiqdi.
Litvin Orbanning taklifini “ultimatum”, bosh vazirning o‘zini esa Rossiya tarafdori deb atadi va Kiyevga “Ukraina uchun ishonchli va adolatli tinchlik” kerakligini aytdi.
O‘t ochishni to‘xtatish tashabbusi Vengriya bosh vaziri tomonidan 11-dekabr kuni Rossiya prezidenti Vladimir Putin bilan telefon orqali muloqot vaqtida ilgari surilgan edi.
Moskva Vengriya bosh vazirining takliflariga tezda javob qaytargan. Ikki davlat rahbarlarining suhbatidan so‘ng darhol Federal xavfsizlik xizmati Vengriyaning Moskvadagi elchixonasiga asirlarni almashtirish bo‘yicha takliflar yuborgan. Rossiya prezidenti matbuot kotibi Dmitriy Peskov jurnalistlarga Rossiya tomoni Vengriya bosh vazirining Ukrainadagi mojaroni tinch yo‘l bilan hal qilish va asirlar almashinuvi bilan bog‘liq gumanitar masalalarni hal qilishga qaratilgan sa’y-harakatlarini qo‘llab-quvvatlashini aytdi.
O‘sha kuni Orban bu taklifni Vladimir Zelenskiy bilan telefon orqali muhokama qilishni istagan, biroq Zelenskiy Vengriya bosh vaziri bilan gaplashishni rad etgan. Vengriya TIV rahbari Peter Siyyartoning qayd etishicha, bu rad etish “biroz tarang, ammo xushmuomala tarzda” ifodalangan. Vazir buni “diplomatiyada mutlaqo misli ko‘rilmagan harakat” deb ta’riflagan.
Izoh (0)