Shimoliy Koreya Ukrainaga qarshi urushda ishtirok etish uchun Rossiyaga 100 ming nafargacha harbiy yuborishi mumkin. Bu haqda manbalarga tayanib, Bloomberg xabar berdi.
Manbalarga ko‘ra, Shimoliy Koreya bunday qadamni qo‘yishi majburiy emas. Bunday miqyosdagi harbiy yordam bir vaqtning o‘zida 100 ming kishilik kontingent yuborilishini anglatmaydi, balki rotatsiya hisobga olingan holda Shimoliy Koreya kuchlarining Rossiyadagi umumiy sonini nazarda tutadi.
Ukrainaning Janubiy Koreyadagi elchisi Dmitriy Ponomarenko ham shunday prognoz bergan. U Kursk viloyatiga yuborilgan 15 ming nafar shimoliy koreyalik harbiy oylik interval bilan almashishini aytgan. Elchi Shimoliy Koreya askarlari Rossiya harbiylari tomonidan egallangan Ukraina hududiga yuborilishini ham istisno etmagan.
Rossiya va Shimoliy Koreya o‘rtasidagi strategik hamkorlik
Bir necha kun avval Shimoliy Koreya va Rossiya keng qamrovli strategik sheriklik to‘g‘risidagi shartnomani ratifikatsiya qildi. Rossiya prezidenti Vladimir Putinning Pxenyanga tashrifi chog‘ida imzolangan bitim, agar tomonlardan biri biron-bir davlat tomonidan qurolli hujumga uchrasa va shu tariqa urush holatida qolsa, bir davlat boshqa davlatga “o‘z ixtiyoridagi barcha vositalar bilan” harbiy va boshqa yordam ko‘rsatishini nazarda tutadi.
So‘nggi haftalarda Ukraina, Janubiy Koreya va AQSH razvedkasi urushda ishtirok etish uchun Shimoliy Koreya harbiylari Rossiyaga yuborilgani haqida bir necha bor xabar bergandi. Pxenyanning bunday xatti-harakati BMTda xavotirga, NATO va Yevropa Ittifoqi tomonidan tanqidga sabab bo‘lgan.
Seul, Vashington va Kiyev ma’lumotlariga ko‘ra, KXDR kuchlarining bir qismi qarshi hujumda ishtirok etish uchun Ukraina bilan chegaradosh Kursk viloyatiga yuborilgan. Shu bilan birga, Shimoliy Koreya harbiylari allaqachon ushbu hududda yo‘qotishlar olib bormoqda, dedi Ukraina prezidenti Vladimir Zelenskiy. AQSH prezidenti Jo Bayden Ukrainaga Rossiya hududidagi nishonlarga zarba berish uchun uzoq masofali ATACMS raketalaridan foydalanishga ruxsat berdi. Bu Rossiyaning Shimoliy Koreya qo‘shinlarini jangga yuborish haqidagi kutilmagan qaroriga javob bo‘ldi.
Izoh (0)