AQSH davlat kotibi Entoni Blinken Ukrainadagi safarbarlik masalasini tanqidiy deb atadi va Kiyevni bu sohada “qiyin, ammo zarur qarorlar” qabul qilishga chaqirdi.
Uning so‘zlariga ko‘ra, safarbarlik Ukraina uchun juda muhim, chunki zarur mablag‘ va qurol bilan ham frontda odamlar bo‘lishi kerak.
“Ukraina keyingi safarbarlik borasida qiyin qaror qabul qilishi kerak, ammo bu zaruriy qaror bo‘ladi”, dedi Blinken.
Avvalroq AQSH prezidenti Jo Bayden ma’muriyati Ukrainaga armiya sonini tezda oshirish uchun safarbar qilishning minimal yoshini 25 yoshdan 18 yoshgacha tushirishni taklif qilgan edi. Shundan so‘ng Ukraina yetakchisi Vladimir Zelenskiy Ukraina armiyasida qurol-yarog‘ yo‘qligini hisobga olib, 18 yoshdan oshgan fuqarolarni Ukrainaga safarbar qilish maqsadga muvofiq emasligini aytgan.
2024-yil 18-mayda Ukrainada safarbarlikni kuchaytiruvchi qonun kuchga kirgan edi. Qonunga ko‘ra, safarbarlik chog‘ida 18 yoshdan 60 yoshgacha bo‘lgan erkaklar o‘zlari bilan har doim harbiy ro‘yxatga olinganlik to‘g‘risidagi hujjatni olib yurishlari va uni hududiy qabul qilish markazi vakilining iltimosiga binoan taqdim etishlari shart.
Qonun e’lon qilinganidan keyin harbiy xizmatni o‘tashga majbur bo‘lgan barcha shaxslarga 60 kun ichida amaldagi yashash manzili, aloqa ma’lumotlari va boshqa harbiy ro‘yxatga olish ma’lumotlariga aniqlik kiritilishi shart.
Mobilizatsiya to‘g‘risidagi qonun loyihasi Oliy Radaga ikki marta kiritilgan. Hukumat uni ilk bor parlamentga dekabr oyida yuborgan, biroq jamoatchilik noroziligidan keyin hujjat qayta ko‘rib chiqish uchun yuborilgan. Qonun loyihasining yangi tahriri Oliy Radaga yanvar oyi boshida kiritilgan, 7-fevralda esa birinchi o‘qishda ma’qullangan edi. Hujjatni yoqlab 450 nafar deputatdan 283 nafari ovoz bergan.
Mazkur qonun loyihasidan harbiy holat sharoitida 36 oy xizmat qilgan harbiy xizmatchilarni demobilizatsiya qilish to‘g‘risidagi nizom armiya bosh qo‘mondoni Aleksandr Sirskiyning talabi bilan olib tashlangan. AFP’ning qayd etishicha, bu frontdagi ko‘plab ukrainalik askarlarning noroziligiga sabab bo‘lgan.
Izoh (0)