Rossiya prezidenti Vladimir Putin Ukraina masalasi bo‘yicha Moskva hech qanday dastlabki shartlarsiz, biroq Istanbul kelishuvlari va joylardagi real vaziyatga asoslanib muloqot olib borishga tayyor ekanligini ma’lum qildi.
Shuningdek, u Kreml Ukrainaning istalgan vakili, shu jumladan agar saylovlarda qatnashib, qonuniy maqomga ega bo‘lsa, Vladimir Zelenskiy bilan ham muzokaralar olib borishga tayyorligini ta’kidladi. Kreml shartnomalarni faqat qonuniy hokimiyat bilan imzolashini aytdi.
“Biz muzokaralarni oldindan hech qanday shart qo‘ymasdan, ammo 2022-yilda Istanbulda o‘tkazilgan muzokaralar jarayonida kelishib olingan asoslar va bugungi kunda yer yuzida sodir bo‘layotgan voqeliklar asosida olib borishga tayyormiz”, dedi Putin tadbirda.
Prezident Rossiyaning tezislari avvalroq, jumladan, iyun oyida Rossiya TIVdagi nutqida bayon etilganini qo‘shimcha qildi.
“Agar kimdir Ukrainada saylovda ishtirok etsa, qonuniylik maqomiga ega bo‘ladi. Biz har qanday odam bilan, shu jumladan Zelenskiy bilan ham, muloqot qilishga tayyormiz. Biz faqat qonuniy vakolatga ega bo‘lgan shaxslar bilan shartnomalar imzolay olamiz. Rada va Rada raisi esa qonuniy hisoblanadi. U to‘liq rejim rahbariyatiga bo‘ysunadi. Bu faqatgina rasmiy yuridik masaladir”, dedi siyosatchi.
Putin iyun oyida Ukrainaga tinch yo‘l bilan vaziyatni hal qilish bo‘yicha taklif bilan chiqqan edi. U mojaroni muzlatishni emas, balki uni to‘xtatishni ilgari surib, Ukraina qo‘shinlarini LXR, DXR, Xerson va Zaporojye viloyatlaridan olib chiqishni, Ukrainaning NATOga qo‘shilish rejalaridan voz kechish shartlarini ma’lum qilgandi.
Izoh (0)