Ukraina prezidenti Vladimir Zelenskiy Gruziya rahbariyatiga qarshi sanksiyalar kiritdi. Bu haqda u o‘zining Telegram kanalidagi videomurojaatida ma’lum qildi.
Ukraina muxolifat namoyishlarini tarqatib yuborgani uchun Gruziya hukumatiga qarshi sanksiyalar kiritdi. Xususan, mamlakat bosh vaziri Irakliy Kobaxidze va rahbariyatning boshqa vakillari, jumladan, hukmron “Gruziya orzusi” partiyasi yetakchisi Bidzina Ivanishviliga nisbatan cheklov choralari qo‘llanilgan.
“Bu Gruziya hukumatining mamlakatni Rossiya prezidenti Vladimir Putinga topshirayotgan qismiga qarshi sanksiyalar. Biz bu mintaqada hech kimni yo‘qota olmaymiz: na Gruziya, na Moldova, na Ukraina. Biz o‘zimizni Moskvadan birgalikda himoya qilishimiz kerak”, dedi Zelenskiy.
Ukraina prezidenti, shuningdek, Yevropa ittifoqi, AQSH va butun dunyoni bu masalada “prinsipial” harakat qilishga chaqirdi. Avvalroq u G‘arbga nisbatan “Gruziya orzusi” siyosati tufayli muxolifat mitinglarini tarqatib yuborishni “sharmandali holat” deb atagan edi.
Gruziya 2023-yil dekabrida Yevropa ittifoqiga a’zo bo‘lish uchun nomzod maqomini olgan. Biroq respublikada “xorijiy agentlar to‘g‘risida”gi qonun qabul qilingandan so‘ng, blokka qo‘shilish jarayoni to‘xtatildi. AQSH inson huquqlari buzilganini tilga olib, o‘nlab Gruziya fuqarolariga viza cheklovlari joriy qildi. Hozirgi norozilik namoyishlari fonida Vashington qo‘shimcha sanksiyalar tayyorlanayotganini e’lon qildi.
Gruziyadagi ichki siyosiy vaziyat oktyabr oxiridagi parlament saylovlaridan keyin keskinlashdi, unda “Gruziya orzusi” yana g‘alaba qozondi. Ovoz berish natijalarini muxolifat partiyalari va prezident Salome Zurabishvili tan olmadi. Bir oy o‘tgach, Kobaxidze Gruziyaning YIga kirishi bo‘yicha muzokaralarni 2028-yil oxirigacha muzlatib qo‘yishi va Yevropa moliyaviy yordamidan voz kechishini ma’lum qildi.
Shu vaqt ichida respublikada xavfsizlik kuchlari bilan to‘qnashuvlar bilan kechgan norozilik namoyishlari bo‘lib o‘tdi.
Izoh (0)