Xitoy rahbari Si Szinpin yanvar oyida Donald Trampning AQSH prezidenti lavozimiga inauguratsiyasi uchun Vashingtonga borishi kutilmayapti. Bu haqda Amerikaning CBS News telekanali manbalarga tayanib xabar berdi.
Avvalroq telekanal o‘z manbalariga tayanib Tramp noyabr oyida bo‘lib o‘tgan prezidentlik saylovidagi g‘alabasidan ko‘p o‘tmay, Si Szinpinga marosimga shaxsiy taklifnoma yuborgani haqida yozgan edi:
“Ayni paytda Xitoyning AQSHdagi elchisi hamda uning rafiqasi 2025-yil 20-yanvarda poytaxtda bo‘lib o‘tadigan AQSH prezidentining inauguratsiyasiga mehmon bo‘lishi kutilmoqda”.
Telekanal manbalariga ko‘ra, xitoylik diplomat safiga Pekindan yana bir necha amaldor qo‘shilishi mumkinligi aytilgan edi.
Xitoyning AQSHdagi elchixonasi ham, Tramp jamoasi vakillari ham xabar nashr qilingan vaqtda Trampning Si Szinpinni inauguratsiyaga taklif qilishi bilan bog‘liq vaziyatga rasman izoh bermagan.
AQSHdagi saylov natijalari 2025-yil 6-yanvarda Kongressning yangi tarkibi tomonidan rasman tasdiqlanadi. Inauguratsiya uchun mas’ul bo‘lajak prezident jamoasi Trampning qasamyod marosimiga boshqa xorijiy mehmonlarni ham taklif qilishni rejalashtirmoqda. Xususan, tadbirda Vengriya bosh vaziri Viktor Orban qatnashishi mumkin.
Inauguratsiyaga odatda elchilar va boshqa diplomatlar taklif qilinadi, ammo davlat departamentining 1874-yilga oid yozuvlari xorijiy yetakchilar hech qachon hokimiyatni topshirish marosimida ishtirok etmaganidan dalolat beradi, deyiladi xabarda.
Viktor Orban 10-dekabr kuni Trampning milliy xavfsizlik bo‘yicha bo‘lajak maslahatchisi Mayk Uols hamda milliarder Ilon Mask bilan Florida shtatidagi Mar-a-Lago qarorgohida uchrashgan.
Tramp o‘tgan hafta Parijdagi rekonstruksiya qilingan Notre Dame soborining ochilish marosimiga tashrif buyurib, saylovlardagi g‘alabasidan keyin birinchi xorijiy tashrifini amalga oshirdi. Siyosatchi Fransiya prezidenti Emmanuel Makronni restavratsiya sur’ati va sifati uchun maqtadi, shuningdek, Ukraina prezidenti Vladimir Zelenskiy bilan qisqa uchrashuv o‘tkazdi.
Izoh (0)