NATOga aʼzo asosiy davlatlar, jumladan, AQSH va Germaniya Ukrainaning ittifoqqa qo‘shilishiga qarshi, chunki ular Rossiya bilan munosabatlardagi keskinlik kuchayishidan xavotirda. Bu haqda Kiyev va Bryusseldagi manbalarga tayanib Wall Street Journal (WSJ) xabar berdi.
Nashrga ko‘ra, Ukraina prezidenti Vladimir Zelenskiy NATOga qo‘shilish urush tugaganidan keyingina mumkinligini tan olsa-da, mamlakatni harbiy blokka qo‘shilishi uchun rasmiy taklif so‘ramoqda. Manbalarning aniqlik kiritishicha, Kiyev NATOga a’zo davlatlar TIV rahbarlaridan o‘z mamlakatlari rahbarlariga Ukrainaga alyansga qo‘shilish taklifini yuborish bo‘yicha hech bo‘lmaganda tavsiyanoma olmoqchi.
“Ammo bu ssenariy ham noaniq istiqbol bo‘lib qolmoqda”, deya qayd etadi nashr.
NATO bosh kotibi Mark Ryutte 3-dekabr kuni alyansning Bryusseldagi yig‘ilishi oldidan o‘tkazilgan matbuot anjumanida NATO Ukrainani ittifoqqa taklif qilish masalasini muhokama qilmayotganini ta’kidlagan.
Ukraina rasmiylari Kiyevning yaqin kelajakda NATOga a’zo bo‘lish istagini bir necha bor aytgan edi.
Zelenskiy Ukraina hech qachon alyansga qisman taklifni qabul qilmasligini taʼkidlagan, biroq u avvalroq Kiyev nazoratidagi hududlar NATO himoyasiga olinsa, mojaroning “qaynoq bosqichi”ni to‘xtatilish ehtimolini ma’lum qilgandi. U, shuningdek, Ukrainaga bu borada hech qanday taklif tushmaganini tan olgan.
Rossiya prezidenti Vladimir Putin avvalroq mojaroni hal qilish shartlarini e’lon qilgan edi. Unga ko‘ra, Putin Qrim, DXR, LXR, Xerson va Zaporojye viloyatlarining Rossiya hududi sifatidagi maqomini tan olish, Ukrainaning qo‘shilmaslik va yadro qurolidan xoli maqomini mustahkamlash, uni demilitarizatsiya va denatsifikatsiya qilish, shuningdek, Rossiyaga qarshi sanksiyalarni bekor qilishni nazarda tutuvchi yangi tinchlik takliflarini ilgari surgan.
Izoh (0)