Yevroparlament Ukrainaga yordamni davom ettirish uchun 19-noyabr kuni navbatdan tashqari favqulodda yig‘ilish o‘tkazadi.
Bu haqda Bryusseldagi yalpi majlisda Yevropa parlamenti spikeri Roberta Metsola ma’lum qildi.
“19-noyabr soat 11:00 da navbatdan tashqari favqulodda yig‘ilish o‘tkazamiz. Yig‘ilish mavzusi Ukrainani qo‘llab-quvvatlashga bag‘ishlanadi. Ukraina prezidenti Vladimir Zelenskiy ham bizga qo‘shiladi”, dedi u.
Yevropa ittifoqi vakillari respublikachi Donald Tramp AQSh prezidentlik saylovlarida g‘alaba qozongach, Kiyevni qo‘llab-quvvatlashni to‘xtatishidan cho‘chimoqda.
Ukraina bo‘yicha maxsus vakil
Avvalroq Donald Tramp Ukrainadagi mojaroni tinch yo‘l bilan hal etish bo‘yicha muzokaralar olib borish uchun maxsus vakil tayinlash niyatida ekani ma’lum qilingandi.
“Juda tajribali va qobiliyatli maxsus vakil tayinlanadi, unga tinchlik bitimini ilgari surish vazifasi yuklanadi”, dedi Fox News telekanali manbalaridan biri.
Taxminlarga ko‘ra, bu lavozim xuddi 2017-yildan 2019-yilgacha Ukraina bo‘yicha ixtiyoriy ravishda maxsus vakil bo‘lgan Kurt Volker kabi pul to‘lanmaydigan bo‘ladi.
G‘alaba rejasi
Britaniyaning Financial Times nashriga ko‘ra, Donald Tramp 2024-yil sentyabr oyida Ukraina davlati rahbari Vladimir Zelenskiy bilan uchrashuvda g‘alaba rejasining ikki bandiga qiziqish bildirgan.
“Ukrainaning Yevropa va AQSHdagi ittifoqchilari, jumladan, nufuzli respublikachilar mamlakatga jiddiy yordamni to‘xtatishni emas, balki Kiyev bilan yaqin hamkorlikni rag‘batlantiradigan takliflarni qanday ishlab chiqish bo‘yicha maslahat berdi”, deyiladi xabarda.
Avvalroq Zelenskiy Ukraina Oliy Radasida g‘alaba rejasini taqdim qilgan edi. Mazkur reja besh banddan iborat. Shuningdek, u uchta maxfiy qoidani o‘z ichiga oladi.
Izoh (0)