Ukraina prezidenti Vladimir Zelenskiy urushda g‘alaba qozongach va o‘zining prezidentlik muddati tugagach, katta sahnaga qaytishga tayyorligini aytdi.
Ma’lumki, Zelenskiy 2019-yilda prezident etib saylanishidan oldin “KVN”dagi chiqishlari va “Xalq xizmatchisi” serialidagi roli bilan tanilgandi. Besh yil oldin esa u kasbini tubdan o‘zgartirgan. Biroq siyosatchi yaqinda Le Parisien nashriga bergan intervyusida muxlislar uni yana sahnada ko‘rishlari mumkinligini istisno etmadi. Hozircha u aniq javob berishga qiynalmoqda.
To‘g‘risini aytganda, javob berishim qiyin, bilmayman. Menimcha, bu umuman olganda odamning ichki dunyosiga bog‘liq, chunki bu urush barchamizga ta’sir qilyapti. Agar men ichimdagi narsalarni yo‘qotmasam, kim biladi, bo‘lishi mumkin, deya fikr bildirdi Zelenskiy.
Prezident urush tugaganidan keyin odatiy fuqarolik hayoti bilan shug‘ullanmoqchi. Zelenskiy yaqinlari bilan ko‘p vaqt o‘tkazishni, ular bilan telefonda emas, jonli muloqot qilishni istaydi. Siyosatchi farzandlari va rafiqasi bilan kinoteatrga borib, dam olishni orzu qiladi.
Rejalarim juda ko‘p. Odamlar urush bo‘lmagan paytlarda har kuni qiladigan ishlari bilan shug‘ullanamiz. Bolalar, oila, ota-onalar. Telefonda emas, gaplashib o‘tiramiz. O‘g‘lim bilan futbol o‘ynayman, qizim bilan universitet haqida gaplashaman, xotinim bilan xizmat safariga boraman, deya qo‘shimcha qildi Ukraina prezidenti.
Izoh (0)