Time jurnali AQSHning saylangan prezidenti Donald Trampni “Yil odami” deb topdi. U bu maqomga da’vogar milliarder Ilon Mask, malika Keyt Middlton va muxolifatchi Yuliya Navalnayani ortda qoldirdi.
Time nashri 1927-yildan beri “Yil odami”ni e’lon qiladi. Reytingni yil davomida matbuot sarlavhalariga eng katta ta’sir ko‘rsatgan “shaxs, shaxslar guruhi yoki hodisa” boshqaradi. 2022-yilda “Yil odami” unvonini prezident Vladimir Zelenskiy, 2023-yilda esa amerikalik xonanda Teylor Svift qo‘lga kiritgandi.
Trampning siyosiy qayta tug‘ilishi Amerika tarixida misli ko‘rilmagan hodisadir. Uning birinchi muddati sharmandalik bilan tugadi, 2020-yilgi saylov natijalarini bekor qilishga urinishlari AQSH Kapitoliysiga hujum bilan yakun topdi. 2022-yil oxirida bir nechta jinoiy tergovlar davom etayotgan paytda u o‘z nomzodini e’lon qilganida, aksariyat partiya amaldorlari undan yuz o‘girdi, deyiladi siyosatchiga berilgan ta’rifda.
Biroq Tramp keyinchalik partiyaning praymerizida g‘alaba qozondi va prezidentlikka nomzod bo‘ldi. Bundan tashqari, u iyul oyida suiqasddan, keyinroq esa yana bir suiqasdga urinishdan aziyat chekdi.
5-noyabr kuni u prezidentlik saylovlarida g‘alaba qozonib, AQSH tarixida avvalgi saylovlarda mag‘lubiyatga uchraganidan keyin Oq uyga qaytishga muvaffaq bo‘lgan ikkinchi sobiq davlat rahbariga aylandi. Bunga qadar demokrat Grover Klivlend bunga muvaffaq bo‘lgandi. 1888-yilda u ikkinchi muddatga saylana olmagan, ammo to‘rt yildan so‘ng g‘alaba qozongandi.
Trampdan tashqari “Yil odami” unvoniga jami o‘n kishi nomzod bo‘lgan:
- AQSH vitse-prezidenti Kamala Harris, Jo Bayden poygadan chiqib ketganidan keyin davlat rahbari lavozimi uchun kurashga kirishgan va Trampga yutqazgan;
- SpaceX va Tesla asoschisi, AQSH prezidentining yangi ma’muriyatida ish boshlaydigan milliarder Ilon Mask;
- Bu yil saraton kasalligi aniqlangan va kimyoterapiya kursini o‘tagan Uels malikasi Keyt Middlton;
- Aleksey Navalniyning bevasi Yuliya Navalnaya;
- Isroil bosh vaziri Binyamin Netanyaxu;
- Federal zaxira tizimi rahbari Jerom Pauell;
- Amerikalik komik va podkast boshlovchisi Jo Rogan;
- Meksika tarixida birinchi ayol prezident Klaudiya Sheynbaum;
- “Meta” rahbari Mark Sukerberg.
Ulardan Sukerberg (2010), Tramp (2016), Harris (2020; Bayden bilan birga) va Mask (2021) avvalroq “Yil odami” deb topilgan.
Izoh (0)