Kiyev NATO-Ukraina kengashining Bryusseldagi yig‘ilishi ochilishi oldidan alyansga to‘liq a’zolikdan boshqa har qanday xavfsizlik kafolatlarini rad etdi. Bu haqda Ukraina Tashqi ishlar vazirligi bayonot berdi.
“Ishonchimiz komilki, Ukraina xavfsizligining yagona haqiqiy kafolati, shuningdek, Rossiyaning Ukrainaga va boshqa davlatlarga nisbatan keyingi tajovuzini to‘xtatuvchi omil Ukrainaning NATOga to‘laqonli aʼzo bo‘lishidir”, deyiladi hujjatda.
Ukraina ittifoqqa a’zolikni almashtiradigan har qanday taklifni oldindan rad etadi.
“Budapesht memorandumining achchiq tajribasini ortda qoldirgan holda, biz Ukrainaning NATOga to‘laqonli aʼzoligi uchun hech qanday muqobil yoki o‘rnini bosuvchi vositalarni qabul qilmaymiz”, deyiladi xabarda.
Ukraina Tashqi ishlar vazirligi “Budapesht memorandumini imzolagan AQSH va Buyuk Britaniyaga, unga qo‘shilgan Fransiya va Xitoyga, Yadro qurolini tarqatmaslik to‘g‘risidagi shartnomaga barcha aʼzo davlatlarga” Ukrainaning NATOga kirishini siyosiy jihatdan qo‘llab-quvvatlashga chaqirdi.
Vazirlik, shuningdek, bu Ukraina va Yevropa xavfsizligi bilan bog‘liqligini qayd etdi. Unga ko‘ra, Ukrainaga qilingan hujum, 1994 yilgi kelishuvlarga zid ravishda, yadroviy qurolsizlanish g‘oyasiga ishonchni yo‘q qildi hamda “Hind-Tinch okeani mintaqasi va Yaqin Sharqdan Yevro-Atlantika makoniga qadar turli mamlakatlarning mavjud yadro arsenallarini yaratish yoki kengaytirish bo‘yicha faol urinishlarni” jonlantirdi.
NATOda Ukrainani qabul qilish bo‘yicha konsensus mavjud emas
Bryusseldagi manbalarning DW nashriga ma’lum qilishicha, 3—4-dekabr kunlari Bryusselda bo‘lib o‘tadigan NATO-Ukraina kengashi yig‘ilishida Ukrainani ittifoqqa taklif qilish qarori bo‘yicha NATO a’zolari o‘rtasida “hech qanday kelishuv belgisi” yo‘q.
“Konsensusga erishish uchun haftalar va oylar kerak bo‘ladi. Bu ertaga sodir bo‘ladi deb o‘ylamayman”, deydi NATOning yuqori martabali diplomati.
Uning so‘zlariga ko‘ra, kelasi yil ehtimoliy muzokaralar oldidan eng kuchli pozitsiyada bo‘lishi uchun Bryusseldagi uchrashuvda asosiy e’tibor Ukrainani qo‘llab-quvvatlashni kuchaytirishga qaratiladi.
“Shu nuqtai nazardan, eng yaxshi yo‘l moliyalashtirish, o‘q-dorilar yetkazib berish va safarbarlikni keskin oshirish bo‘lib qolmoqda”, deya ta’kidlaydi amerikalik diplomat.
Ukraina prezidenti Vladimir Zelenskiy avvalroq Kiyev nazoratidagi Ukraina hududi NATO himoyasiga olinsa, urushning “issiq bosqichi” tugashi mumkinligini aytgan edi. Uning aniqlik kiritishicha, bosib olingan hududlarsiz mamlakatni qisman harbiy ittifoqqa taklif qilish mumkin emas.
“Ukraina hududining bir qismi uchun NATOga taklif bo‘lishi mumkin emas, bu boshqa barcha hududlar nafaqat xavf ostida, balki boshqa barcha hududlar ukrainalik emas, shuning uchun Ukraina bunga hech qachon rozi bo‘lmaydi. Bu boy berilgan hududlar Ukraina emasligini avtomatik ravishda tan olishdir, shuning uchun Ukraina bunga hech qachon rozi bo‘lmaydi”, deya taʼkidlagan Zelenskiy.
Izoh (0)