O‘zbekiston Respublikasi Korrupsiyaga qarshi kurashish agentligi “E-anticor.uz” portalini texnik rivojlantirish bo‘yicha 990 million so‘mlik shartnoma tuzdi. Bu haqda davlat xaridlari portali ma’lumotlarida keltirilgan.
Shartnoma 2024-yilning 30-sentyabr kuni Qashqadaryo viloyatida faoliyat yurituvchi “Ta’lim sifat invest” xususiy korxonasi bilan tuzilgan.
Shartnomaga ilova sifatida “E-anticor.uz” elektron tizimini takomillashtirish va modernizatsiya qilish bo‘yicha ishlarni bajarishning kalendar rejasi hamda spetsifikatsiyasi tasdiqlangan.
Kalendar rejaga muvofiq ishlar uch bosqichda amalga oshirilishi va 130 kun davomida buyurtmachiga topshirilishi belgilangan.
Shartnomaning umumiy bahosi 2-ilovada ko‘rsatilgan narxlarni kelishish bayonnomasiga muvofiq qo‘shimcha qiymat solig‘i bilan jami 990 000 000 (to‘qqiz yuz to‘qson million) so‘mni tashkil qiladi.
Bunda dastlabki loyihaviy yechimlarni ishlab chiqish (eskiz loyihasini amalga oshirish) va buyurtmachi bilan kelishish 25 million so‘m, loyiha dizayn maketlarini ishlab chiqish esa 95 million so‘m, elektron tizim va uning modullarini dasturlash ishlarini olib borish, ishlab chiqish, sozlash va o‘rnatish ishlarini amalga oshirish 775 million so‘mga baholangan.
Foydalanish hujjatlarini ishlab chiqish, tizimni foydalanishga topshirish, qo‘llab-quvvatlash, qabul qilish, sinovdan o‘tkazish va kafolatli xizmat ko‘rsatish ishlari esa jami 95 million so‘mni tashkil etgan.
Qonunbuzilish holatlariga yo‘l qo‘yilgan bo‘lishi mumkin
“Davlat xaridlari to‘g‘risida”gi qonun va davlat xaridlari sohasidagi boshqa qonunchilik hujjatlarining to‘g‘ri qo‘llanishi ustidan davlat nazoratini amalga oshirishga vakolatli organ hisoblangan agentlikning o‘zi shartnoma bilan bog‘liq bir qator qonunbuzilishlarga ham yo‘l qo‘yganini ko‘rish mumkin.
Misol uchun, qonunning 71-moddasida davlat buyurtmachilari to‘g‘ridan to‘g‘ri shartnomalar tuzilgani to‘g‘risidagi axborotni shartnoma tuzilgan paytdan e’tiboran uch ish kuni ichida maxsus axborot portaliga joylashtirishi shartligi, bo‘lmasa, ushbu shartnomalar bo‘yicha to‘lovlar amalga oshirilmasligi belgilab qo‘yilgan.
Shunday bo‘lsa-da, agentlik mas’ullari 30-sentyabr kuni tuzilgan shartnomani oradan o‘n ikki ish kuni o‘tib joylashtirgan.
Bundan tashqari, shartnoma tuzilishidan avval muhokama qilish uchun tizimga joylashtirilgani, biroq jamoatchilik tomonidan to‘g‘ridan to‘g‘ri shartnoma tuzish bo‘yicha e’tirozlar tushmagani bildirilgan bayonnoma ilova qilingan.
_page-0001.jpg)
Qanday qilib imzolanganidan o‘n ikki ish kunidan keyin joylashtirilgan shartnoma jamoatchilik muhokamasidan o‘tkazilyapti?
Agentlikning ushbu harakati prezidentning 2024-yil 10-iyuldagi “Davlat xaridlari tizimini takomillashtirish va unda kichik tadbirkorlik subyektlari ishtirokini rag‘batlantirish chora-tadbirlari to‘g‘risida”gi qarorining 5-bandiga zid hisoblanadi.
Nega shartnoma qonunda belgilangan muddatlarda joylashtirilmadi?
Uch yilda jami 1,6 milliard so‘mlik uchta shartnoma
Korrupsiyaga qarshi kurashish agentligi va “Ta’lim sifat invest”xususiy korxonasi o‘rtasida shu kunga qadar uchta shartnoma tuzilgan.
Birinchisi, tizimni funksional kengaytirish maqsadida 2022-yilning 22-iyul kuni tuzilgan bo‘lib, buning uchun jami 350 million so‘m mablag‘ ajratilgan. Biroq shartnoma davlat xaridlari elektron tizimiga joylashtirilmagan.
2023-yilning 20-sentyabr kuni esa portalni texnik rivojlantirish maqsadida yana 300 million so‘mlik shartnoma imzolangan bo‘lib, shartnoma tuzilganidan 16 ish kuni o‘tib tizimga joylashtirilgan. Bunda yuqoridagidek qonunbuzarlikka yo‘l qo‘yilgan.
Ma’lumot uchun, umumiy hisobda shu kunga qadar agentlik portal uchun jami 1 milliard 640 million so‘m mablag‘ sarflangan.
Qisqacha tizim haqida
“E-antikorrupsiya” ochiq portali bu O‘zbekiston Respublikasi Korrupsiyaga qarshi kurashish agentligining ichki elektron resurslaridan dolzarb ma’lumotlarni to‘plashga qaratilgan axborot resursi hisoblanadi.
Portal Birlashgan Millatlar Tashkiloti Taraqqiyot dasturi grantlari doirasida ishga tushirilgan bo‘lib, 2022-yilning 28-mart kungi Tovarlarni va bajarilgan ishlarni qabul qilish va topshirishning umumiy aktiga asosan Korrupsiyaga qarshi kurashish agentligiga topshirilgan.
Portalda 2022-yildan beri korrupsiyaga qarshi ishlar samaradorligining yillik reyting natijalari, shuningdek, davlat idoralari va tashkilotlarining har yili yangilanadigan korrupsiyaga moyil bo‘lgan munosabatlar va lavozimlar reyestri bilan tanishish mumkin.
“Daryo” shu va mavzuga oid boshqa savollarga agentlik mas’ullaridan munosabat kutib qoladi.
Izoh (0)