Ўзбекистон Республикаси Коррупцияга қарши курашиш агентлиги “E-anticor.uz” порталини техник ривожлантириш бўйича 990 миллион сўмлик шартнома тузди. Бу ҳақда давлат харидлари портали маълумотларида келтирилган.
Шартнома 2024 йилнинг 30 сентябрь куни Қашқадарё вилоятида фаолият юритувчи “Таълим сифат инвест” хусусий корхонаси билан тузилган.
Шартномага илова сифатида “E-anticor.uz” электрон тизимини такомиллаштириш ва модернизация қилиш бўйича ишларни бажаришнинг календарь режаси ҳамда спецификацияси тасдиқланган.
Календарь режага мувофиқ ишлар уч босқичда амалга оширилиши ва 130 кун давомида буюртмачига топширилиши белгиланган.
Шартноманинг умумий баҳоси 2-иловада кўрсатилган нархларни келишиш баённомасига мувофиқ қўшимча қиймат солиғи билан жами 990 000 000 (тўққиз юз тўқсон миллион) сўмни ташкил қилади.
Бунда дастлабки лойиҳавий ечимларни ишлаб чиқиш (эскиз лойиҳасини амалга ошириш) ва буюртмачи билан келишиш 25 миллион сўм, лойиҳа дизайн макетларини ишлаб чиқиш эса 95 миллион сўм, электрон тизим ва унинг модулларини дастурлаш ишларини олиб бориш, ишлаб чиқиш, созлаш ва ўрнатиш ишларини амалга ошириш 775 миллион сўмга баҳоланган.
Фойдаланиш ҳужжатларини ишлаб чиқиш, тизимни фойдаланишга топшириш, қўллаб-қувватлаш, қабул қилиш, синовдан ўтказиш ва кафолатли хизмат кўрсатиш ишлари эса жами 95 миллион сўмни ташкил этган.
Қонунбузилиш ҳолатларига йўл қўйилган бўлиши мумкин
“Давлат харидлари тўғрисида”ги қонун ва давлат харидлари соҳасидаги бошқа қонунчилик ҳужжатларининг тўғри қўлланиши устидан давлат назоратини амалга оширишга ваколатли орган ҳисобланган агентликнинг ўзи шартнома билан боғлиқ бир қатор қонунбузилишларга ҳам йўл қўйганини кўриш мумкин.
Мисол учун, қонуннинг 71-моддасида давлат буюртмачилари тўғридан тўғри шартномалар тузилгани тўғрисидаги ахборотни шартнома тузилган пайтдан эътиборан уч иш куни ичида махсус ахборот порталига жойлаштириши шартлиги, бўлмаса, ушбу шартномалар бўйича тўловлар амалга оширилмаслиги белгилаб қўйилган.
Шундай бўлса-да, агентлик масъуллари 30 сентябрь куни тузилган шартномани орадан ўн икки иш куни ўтиб жойлаштирган.
Бундан ташқари, шартнома тузилишидан аввал муҳокама қилиш учун тизимга жойлаштирилгани, бироқ жамоатчилик томонидан тўғридан тўғри шартнома тузиш бўйича эътирозлар тушмагани билдирилган баённома илова қилинган.
_page-0001.jpg)
Қандай қилиб имзоланганидан ўн икки иш кунидан кейин жойлаштирилган шартнома жамоатчилик муҳокамасидан ўтказиляпти?
Агентликнинг ушбу ҳаракати президентнинг 2024 йил 10 июлдаги “Давлат харидлари тизимини такомиллаштириш ва унда кичик тадбиркорлик субъектлари иштирокини рағбатлантириш чора-тадбирлари тўғрисида”ги қарорининг 5-бандига зид ҳисобланади.
Нега шартнома қонунда белгиланган муддатларда жойлаштирилмади?
Уч йилда жами 1,6 миллиард сўмлик учта шартнома
Коррупцияга қарши курашиш агентлиги ва “Таълим сифат инвест”хусусий корхонаси ўртасида шу кунга қадар учта шартнома тузилган.
Биринчиси, тизимни функсионал кенгайтириш мақсадида 2022 йилнинг 22 июль куни тузилган бўлиб, бунинг учун жами 350 миллион сўм маблағ ажратилган. Бироқ шартнома давлат харидлари электрон тизимига жойлаштирилмаган.
2023 йилнинг 20 сентябрь куни эса портални техник ривожлантириш мақсадида яна 300 миллион сўмлик шартнома имзоланган бўлиб, шартнома тузилганидан 16 иш куни ўтиб тизимга жойлаштирилган. Бунда юқоридагидек қонунбузарликка йўл қўйилган.
Маълумот учун, умумий ҳисобда шу кунга қадар агентлик портал учун жами 1 миллиард 640 миллион сўм маблағ сарфланган.
Қисқача тизим ҳақида
“Э-антикоррупция” очиқ портали бу Ўзбекистон Республикаси Коррупцияга қарши курашиш агентлигининг ички электрон ресурсларидан долзарб маълумотларни тўплашга қаратилган ахборот ресурси ҳисобланади.
Портал Бирлашган Миллатлар Ташкилоти Тараққиёт дастури грантлари доирасида ишга туширилган бўлиб, 2022 йилнинг 28 март кунги Товарларни ва бажарилган ишларни қабул қилиш ва топширишнинг умумий актига асосан Коррупцияга қарши курашиш агентлигига топширилган.
Порталда 2022 йилдан бери коррупцияга қарши ишлар самарадорлигининг йиллик рейтинг натижалари, шунингдек, давлат идоралари ва ташкилотларининг ҳар йили янгиланадиган коррупцияга мойил бўлган муносабатлар ва лавозимлар реестри билан танишиш мумкин.
“Дарё” шу ва мавзуга оид бошқа саволларга агентлик масъулларидан муносабат кутиб қолади.
Изоҳ (0)