“O‘zbekneftgaz” AJ boshqaruvi raisi Mehriddin Abdullayevning topshirig‘iga ko‘ra, moliyaviy va komplayens nazorati yo‘nalishida korrupsiya, iqtisodiy jinoyatlarga qarshi kurashishga, ularga kelgusida yo‘l qo‘yilishining oldini olishga qaratilgan profilaktik nazorat tadbirlari davom etmoqda.
Navbatdagi o‘rganish “Qarshi neft bazasi” mas’uliyati cheklangan jamiyatida o‘tkazildi. Tekshiruv natijalariga ko‘ra, neft mahsulotlarining saqlanishi, iste’molchilarga yetkazib berilishi, debitorlik, kreditor qarzdorliklar bilan bog‘liq ko‘plab noo‘rin xarajatlar, shuningdek, amaldagi qonunchilikka rioya qilinmaslik holatlari aniqlandi.
Jamiyat va uning filiallari rahbariyati hamda mutasaddi xodimlarining o‘z vazifalariga sovuqqonlik bilan yondoshuvi, shuningdek, mahsulotlarni amaldagi qonunchilikka zid ravishda to‘lovsiz berib yuborilishi oqibatida 2021-yil 1-yanvar holatiga nisbatan, jami debitor qarzdorlikning 21 milliard 213 million so‘mga ortishiga yo‘l qo‘yilgan.
Xususan:
- Qarshi neft bazasida (filiallarsiz) 9 milliard 257,4 million so‘mga oshgan;
- Koson filialida 10 milliard 553,1 million so‘mga oshgan;
- G‘uzor filialida 1 milliard 386,5 million so‘mga oshgan.
Huddi shunday, Yakkabog‘ filialiga qarashli 3 ta FYoTShda jami 1 milliard 162 million so‘mlik 130 254 litr neft mahsulotlari istemolchilarga to‘lovsiz ruxsatnomalar, hisob-ma’lumotnomalar rasmiylashtirilmasdan yetkazib berilgan va kamomad holatiga yo‘l qo‘yilgan. Istemolchilardan pul mablag‘lari tushirilib, kamomad to‘liq qoplandi.
Neft bazaning Koson filiali mahsulotlar omborida o‘tkazilgan xatlovda jami 80,5 million so‘mlik 11,0 tonna Ai-80 avtobenzindan kamomad aniqlanib, javobgar shaxs tomonidan qoplanishi ta’minlandi.
Ushbu filialning FYoTShlardagi mavjud tovar moddiy boyliklari xatlovdan o‘tkazilganda, jami 16 ta FYoTShda 15,4 million so‘mlik tovar moddiy boyliklar yaroqsiz holatga keltirilganligi aniqlangan.
Shuningdek, 2015—2017-yillarda xodimlarning xarid qilingan namunali uy-joylardan bo‘lgan 10,7 million so‘m qarzdorligining vaqtida undirish choralari ko‘rilmagan.
Aniqlangan xato-kamchiliklarni bartaraf etish, ularga kelgusida yo‘l qo‘yilishini oldini olish maqsadida “O‘zbekneftgaz” AJning tegishli departamentlari va neft baza jamoasi ishtirokida “Qarshi neft bazasi” MChJda kengaytirilgan yig‘ilish o‘tkazilib, muhokama qilindi.
O‘rganishlar natijasiga ko‘ra, “Qarshi neft bazasi” MChJning xato-kamchiliklarga yo‘l qo‘ygan jami 28 nafar mas’ul mansabdor shaxsga nisbatan qat’iy intizomiy choralar ko‘rildi, shundan 6 nafar xodim bilan tuzilgan mehnat shartnomalari bekor qilindi, 22 nafariga nisbatan intizomiy jazo choralari qo‘llanildi. Xatoliklarni bartaraf qilish, kelgusida yo‘l qo‘ymaslik, tegishli huquqiy baho berish va talon-tarojliklarni kamaytirish yuzasidan zarur chora-tadbirlar belgilandi.
Qarshi neft bazasida aniqlangan qonun buzilish holatlari yuzasidan hujjatlar to‘planib, huquqiy baho berish uchun huquqni muhofaza qiluvchi organlarga yuborildi.
“O‘zbekneftgaz” AJ matbuot xizmati
Izoh (0)