Rossiya yadroviy kallak va yadroviy dvigatelga ega yangi “Burevestnik” qanotli raketasini sinovdan o‘tkazishga hozirlik ko‘rmoqda. Bu haqda tahlilchilarga tayanib, Reuters xabar berdi.
Ma’lum qilinishicha, Kaliforniyadagi Montere Xalqaro tadqiqotlar institutidan Jeffri Lyuis va Virjiniyadagi CNA tahliliy markazidan Dekker Evelit Planet Labs sun’iy yo‘ldoshi tasvirlarini o‘rganib, ushbu xulosaga kelgan.
Mutaxassislarga ko‘ra, Barens dengizidagi Novaya Zemlya orollarida joylashgan Pankovo poligonida jonlanish kuzatilmoqda — xodimlar, texnika, kemalar va samolyotlar soni ortgan. Bu vositalar avval “9M730 Burevestnik” raketasi sinovlarida ham ishtirok etgan edi.
Lyuisning ta’kidlashicha, uchish maydonchasida harakatlar ko‘paygan, operatsiyalarni ta’minlash uchun zarur jihozlar olib kelinmoqda. Manbalarga ko‘ra, sinov shu hafta ichida bo‘lib o‘tishi mumkin. Oq uy, Pentagon, Markaziy razvedka boshqarmasi va Rossiya Mudofaa vazirligi ushbu vaziyatga hozircha izoh bermadi.
Rossiya prezidenti Vladimir Putin “Burevestnik” haqida birinchi marta 2018-yilda Federal majlisga murojaat qilganda gapirgan edi. U raketaning juda uzoq masofaga uchishi va kutilmagan parvoz yo‘nalishiga ega ekanini aytgan.
AQSHning Nuclear Threat Initiative markazi ma’lumotiga ko‘ra, 2017–2019-yillar oralig‘ida Rossiya kamida 13 marta “Burevestnik”ni sinagan, biroq faqat 2 ta sinov qisman muvaffaqiyatli o‘tgan. 2019-yil avgust oyida Severodvinsk yaqinida bo‘lib o‘tgan portlash oqibatida “Rosatom” va Mudofaa vazirligining 7 nafar xodimi halok bo‘lgan. Tahlilchilar bu portlash aynan “Burevestnik”ning muvaffaqiyatsiz sinovi oqibati ekanini istisno etmagan.
Putin 2023-yil oktyabr oyida raketaning yadroviy dvigatelga ega versiyasi so‘nggi muvaffaqiyatli sinovdan o‘tgani haqida ma’lum qilgan edi. The New York Times o‘sha paytda sun’iy yo‘ldosh tasvirlarini o‘rganib, sinovlar Novaya Zemlyada o‘tkazilgan bo‘lishi mumkinligini yozgan.
Izoh (0)