Yaponiya Liberal-demokratik partiyasi (LDP) raisi Shigeru Ishiba parlament quyi palatasida o‘tkazilgan ikkinchi ovoz berish natijalariga ko‘ra bosh vazir etib saylandi.
Bosh vazir saylovining ikkinchi bosqichi 1994-yildan beri 30 yil ichida birinchi marta o‘tkazildi: ovoz berishning birinchi bosqichida nomzodlarning hech biri kerakli ovozni ololmadi.
Birinchi turdagi muvaffaqiyatsizlik
Birinchi tur natijalariga ko'ra, Isiba 221 ta ovoz oldi. Uning asosiy raqibi, muxolifatdagi Konstitutsiyaviy-demokratik partiya vakili Yosixiko Noda – 151 ta ovozga ega bo‘ldi.
Demokratik partiya rahbari Yuichiro Tamaki uchun 28 deputat ovoz berdi. Ikkinchi turda Sigeru Isiba va Yoshixiko Noda bosh vazirlik uchun kurash olib borishdi. Eng qizig‘i, Isiba ovoz berish jarayonida uxlab qoldi. Lekin bu holat uning g‘alaba qozonishiga halaqit qilmadi.
LDP rahbari 221 ta ovoz oldi, Noda esa 160 ta ovoz bilan kifoyalandi.
“Men bosh vazir etib tayinlandim. Men bu mas’uliyatni tantanali ravishda o‘z zimmamga olaman”, dedi Isiba yangi hukumat tuzilganidan keyingi chiqishida.
Bosh vazir, shuningdek, 27-oktyabrda bo‘lib o‘tgan o‘ta muvaffaqiyatsiz erta parlament saylovlaridan so‘ng o‘zi rahbarlik qilayotgan LDP partiyasi “haqiqiy xalq partiyasi sifatida qayta tug‘ilishi” zarurligini ta’kidladi.
Parlamentning tarqatib yuborilishi
1-oktyabr kuni Yaponiya parlamenti Yaponiya siyosatining faxriysi, Liberal-demokratik partiya rahbari 67 yoshli Sigeru Ishibani bosh vazir lavozimiga tasdiqladi.
27-sentyabr kuni partiyaning avvalgi raisi va bosh vazir Fumio Kisida qayta saylanish uchun nomzodini qo‘ymaslikka qaror qilganidan keyin LDP uni o‘z yetakchisi etib saylagandi.
Bosh vazir lavozimini egallagan Shigeru Ishiba 27-oktyabrda mamlakatda parlament quyi palatasi tarqatib yuborilishi va muddatidan oldin saylovlar o‘tkazilishini e’lon qildi (rejalashtirilgan saylovlar 2025-yilning oktyabr oyidan kechiktirmay o‘tkazilishi kerak edi).
LDP atrofidagi mashmashalar
France-Presse taʼkidlaganidek, erta saylovlarda Isiba Yaponiyada o‘nlab yillar davomida hukmron partiya bo‘lib kelayotgan LDP pozitsiyasini mustahkamlashga umid qilgan.
Biroq so‘nggi oylarda partiya faoliyatini noqonuniy moliyalashtirish bilan bog‘liq qator korrupsiya va siyosiy-moliyaviy mojarolar, shuningdek, xayriya yig‘ishdagi qonunbuzarliklar (jumladan, partiya mablag‘larining bir qismini o‘zlashtirish) natijasida partiya reytingi sezilarli darajada pasayib ketdi.
LDP partiyasining ba'zi a'zolarining "Birlashgan cherkov" totalitar sektasi bilan aloqalari atrofida ham janjal chiqdi. LDP nufuzining pasayishiga saylovchilarning hukumatning oxirgi ikki yil davomida surunkali inflyatsiyani jilovlay olmagan iqtisodiy siyosatidan noroziligi ham sabab bo'ldi.
Tramp va Isiba
Donald Tramp AQSh prezidenti etib saylanganidan so‘ng Sigeru Isiba Xalqaro maydonda jiddiy muammoga duch kelmoqda. AFP ta'kidlaganidek, AQSh mamlakatga eksport qilinadigan tovarlarga bojxona to'lovlarini keskin oshirmoqchi. Bu esa AQSH bilan katta hajmdagi eksport aloqalariga ega Yaponiya uchun jiddiy sinov bo‘ladi. Shuningdek, Tramp Yaponiyaga harbiy xarajatlarni oshirish uchun bosim o‘tkazishni boshlashi mumkinligi xabar qilinmoqda.
Yaponiya Bosh vaziri Sigeru Ishiba dushanba kuni “AQSHning saylangan prezidenti Donald Tramp bilan bevosita uchrashish niyatida” ekanini aytgan.
Izoh (0)