Korrupsiyaga qarshi kurashish agentligida “Korrupsiyaga qarshi kurashda korrupsiya haqida xabar berishning o‘rni va ta’siri” mavzusida o‘tkazilgan so‘rovnoma natijalari hamda “Korrupsiyaga oid huquqbuzarlik haqida xabar bergan shaxslarni himoya qilish to‘g‘risida”gi qonun loyihasi taqdimoti o‘tkazildi. Bu haqda “Daryo” muxbiri xabar bermoqda.
Dastlab loyiha doirasida o‘tkazilgan “Korrupsiyaga qarshi kurashda korrupsiya haqida xabar berishning o‘rni va ta’siri” mavzusidagi so‘rovnoma natijalari taqdimot qilindi.
Tadbirda Korrupsiyaga qarshi kurashish agentligi direktori Akmal Burhonov loyiha natijalari haqida fikr bildirar ekan, respondentlarning yarmidan ko‘pi xabar berish oqibatidan qo‘rqishi achinarli ekanligini ta’kidlagan.
“Respondentlarning salkam 75 foizi xabar berishga tayyorligi bizni quvontiradi, albatta. Biroq ularning yarmidan ko‘prog‘i korrupsiya haqida xabar berish oqibatlaridan qo‘rqishini bildirishi bizni xavotirga soladi. Bu esa bizning ularga yetarli darajada huquqiy asoslarni yaratib bermaganligimizni anglatadi. Shuningdek, huquqiy bilimlarini oshirishda ham ishlarni tashkil etishimiz lozimligini ko‘rsatadi.
Afsus bilan aytadigan holat bu respondentlarning 13,8 foizdan ortig‘i minnatdorlik belgisi sifatida o‘zlari xohlab pul berishi, bundan tashqari keng tarqalgan suyunchi berish kabi holatlarni odatiy qabul qilinishi. Vaholanki, bu korrupsiya jinoyati hisoblanadi. Bu ham bizni xavotirga soladigan xatarlardan biri hisoblanadi. Bundan tashqari, mahalliy hokimiyat organlariga ishonchsizlik bizni o‘ylantiradi”, deydi Akmal Burhonov.
Tadbirda O‘zbekistonda xabar beruvchilarni himoya qilish bo‘yicha qonunchilik asoslari, davlat organlarida qonunbuzarliklar to‘g‘risida xabar berish mexanizmlari, xabar beruvchilar to‘g‘risidagi qonun hujjatlarining joriy etilishi va samaradorligi bilan bog‘liq muammolar, xabar beruvchilar bilan aloqa o‘rnatish masalalari atroflicha ko‘rib chiqildi.
Ta’kidlanishicha, “Korrupsiyaga oid huquqbuzarlik haqida xabar bergan shaxslarni himoya qilish to‘g‘risida”gi qonun loyihasi Korrupsiyaga qarshi kurashish agentligi xodimlari, Koreya Respublikasi Korrupsiyaga qarshi kurashish va fuqarolik huquqlari komissiyasi va BMT Taraqqiyot dasturi ekspertlari hamda manfaatdor vazirlik va idoralar vakillaridan iborat ishchi guruhlar tomonidan tayyorlangan.
Qonun loyihasini ishlab chiqishdan asosiy maqsad korrupsiyaga nisbatan murosasiz muhitni shakllantirish, halollik standartini joriy qilish va manfaatlar to‘qnashuviga yo‘l qo‘ymaslik, xabar bergan shaxslarni himoya qilish bo‘yicha ta’sirchan choralar ko‘rish hamda rag‘batlantirish bilan bog‘liq boshqa munosabatlarni tartibga solishdan iborat.
Shuningdek, tadbir doirasida qonun loyihasini yanada takomillashtirish yuzasidan o‘zaro fikr almashilib, xabar beruvchilarni himoya qilish bo‘yicha xalqaro amaliyot va ilg‘or xorijiy tajribalar bilan o‘rtoqlashilgan.
Avvalroq O‘zbekistonda korrupsiya haqida xabar berganlarga himoya choralari belgilanayotgani xabar qilingandi.
Izoh (0)