“O‘zbekneftgaz” AJ boshqaruvi raisi Mehriddin Abdullayevning topshirig‘iga ko‘ra, moliyaviy va komplayens nazorati yo‘nalishida korrupsiya, iqtisodiy jinoyatlarga qarshi kurashishga, ularni kelgusida yo‘l qo‘yilishini oldini olishga qaratilgan profilaktik tadbirlar davom etmoqda. Navbatdagi o‘rganish “Guliston neft bazasi” MChJda o‘tkazildi.
O‘rganish davomida neft mahsulotlarining saqlanishi, iste’molchilarga yetkazib berilishi, debitorlik, kreditor qarzdorliklar bilan ko‘plab noo‘rin xarajatlar, shuningdek, amaldagi qonunchilikka rioya qilinmaslik holatlari aniqlandi.
Jamiyat va filial rahbariyati hamda mutasaddi xodimlarining o‘z vazifalariga sovuqqonlik bilan yondoshishi oqibatida jamiyatning 2022-yil 1-mart kuni holatiga jami debitor qarzdorlik 24 692,5 million so‘mni tashkil qilgan bo‘lib, mas’ul xodimlar tomonidan vaqtida undirish choralari ko‘rilmaganligi natijasida 9 089,2 million so‘m “umidsiz” qarzdorlikka aylanib ulgurgan.
Jamiyat mas’ul xodimlari tomonidan 3 226,9 million so‘mlik neft mahsulotlaring kamomadini yashirish maqsadida, klasterlar hamda faoliyat yuritilib turgan va tugatilgan fermer xo‘jaliklariga to‘lovsiz rasmiylashtirilib, debitorlik qarzdorlikda aks ettirilgan.
Shuningdek, “Guliston neft bazasi” MChJ va Sirdaryo filialiga qarashli AYoQShlar va FYoTShlarda jami 10 852 litr qiymati 98,2 million so‘mlik neft mahsulotlaridan kamomad aniqlandi va amalga oshirilgan chora-tadbirlar natijasida mazkur mablag‘lar jamiyat hisob raqamiga to‘liq qaytarildi.
Sirdaryo filialining 2021-yilning sentabr oyi hisobotlarida haqiqatda mavjud korxonalardan 146,5 million so‘mlik muddati o‘tgan debitorlik qarzdorliklari asossiz ravishda hisobotdan chiqarilib, jamiyatning zarariga olib borilgan.
Neftni qayta ishlash zavodining neft mahsulotlarini mas’ul saqlash yuzasidan tuzilgan shartnoma talablari buzilgan holda zavodga qarashli mas’ul saqlashdagi 372,0 tonna EKO dizel yoqilg‘isini belgilangan tartibda birja savdolari orqali sotib olmasdan, asossiz iste’molchilarga sotib yuborilishiga yo‘l qo‘yilgan.
Jamiyat va filial mansabdor shaxslari tomonidan o‘z mansab vakolatlarini suiiste’mol qilgan holda jamiyatning hisob raqamidan 419,6 million so‘m pul mablag‘larini shaxsiy manfaatini ko‘zlagan holda, hech qanday asoslarsiz o‘zining plastik kartalariga o‘tkazgan va o‘z ehtiyojlari uchun ishlatib yuborilgan. Amalga oshirilgan chora-tadbirlar natijasida, aybdor xodimlardan jamiyat hisob raqamiga to‘liq qaytarildi.
Jamiyat mansabdor shaxsi tomonidan jamiyat balansida bo‘lgan jami 23 dona bozor qiymati jami 310,0 million so‘mlik sig‘imlar asossiz hisobdan chiqarilib, jamiyatga zarar yetkazilgan.
“O‘zbekneftgaz” AJ tizimida manfaatlar to‘qnashuvini oldini olishga qaratilgan keng ko‘lamli amaliy ishlarga qaramasdan jamiyat mansabdor shaxslar tomonidan O‘zbekiston Respublikasi qonun hujjatlariga zid ravishda jami 2 696,6 million so‘mlik manfaatlar to‘qnashuvi holatlari, ya’ni o‘zlarining yaqin qarindoshlariga tegishli bo‘lgan korxonalarga neft mahsulotlarini berib yuborish hamda xarid qonunchiligiga zid ravishda shartnomalar tuzish holatlari aniqlangan.
Aniqlangan holatlar bo‘yicha kamchiliklarni undirish va vaziyatga huquqiy baho berish uchun o‘rganish hujjatlari tegishli tartibda huquqni muhofaza qiluvchi idoralarga taqdim etildi.
“O‘zbekneftgaz” AJ matbuot xizmati
Izoh (0)