Korrupsiyaga qarshi kurashish agentligi davlat xizmatchilarining tadbirkorlik faoliyati bilan shug‘ullanib kelayotganligi holatlari yuzasidan ma’lumot e’lon qildi.
Agentlik tomonidan o‘tkazgan tekshiruvlarga ko‘ra, O‘zbekistonda jami 1378 nafar davlat xizmatchilari (138 nafari hokim va hokim o‘rinbosarlari, 148 nafari davlat banklari boshqaruvchisi va ularning o‘rinbosarlari, 1092 nafari hokim yordamchilari) davlat xizmati bilan birga (rahbar yoki ta’sischi sifatida) tadbirkorlik faoliyati bilan shug‘ullanib kelayotgani aniqlangan.
Shuningdek, davlat xaridlari sohasida o‘tkazilgan o‘rganishlarda hududlarda davlat tashkilotlarining mansabdor shaxslari va ularning yaqin qarindoshlariga tegishli korxonalar davlat xaridlarida ishtirok etib, g‘olib bo‘lgani aniqlangan.
Xususan, Piskent tumani hokimi Rahimjon Rixsiyev 2022-yil 6-sentabr kuni e-auksion platformasi orqali o‘tkazilgan savdolarda Toshkent viloyati Ohangaron tumani Markaziy qo‘rg‘on mahallasi hududidagi 397,9 gektar yer maydonini 30 yilga ijaraga berish yuzasidan o‘tkazilgan savdolarda 999 milliard 999 million 999 ming so‘mlik taklifi bilan g‘oliblikni qo‘lga kiritgan.
Keyinchalik Rixsiyev ushbu xabarga munosabat bildirib, o‘zi yaylovni ijaraga olish niyatida bo‘lmaganini, onlayn auksion tizimining ishlashini o‘z ko‘zi bilan ko‘rish uchun tajriba tariqasida shunday qilganini aytib raddiya bildirgan.
Biroq shunga qaramasdan 2022-yil 13-sentabr kuni uning ta’sischiligida qishloq xo‘jaligiga ixtisoslashgan “Animals Service” MChJ tashkil etilganligi va u (o‘rganish o‘tkazilgan 23-oktabr holatiga) mazkur korxona ta’sischiligidan chiqmagani ma’lum bo‘lgan.
Vazirlar Mahkamasining 1992-yil 6-martdagi “Tadbirkorlik faoliyati bilan shug‘ullanish taqiqlangan mansabdor shaxslarning ro‘yxati to‘g‘risida”gi qarorida davlat boshqaruv organlari xodimlari tadbirkorlik faoliyati bilan shug‘ullanishi taqiqlangan.
Shuningdek, 2022-yil 8-avgust kuni qabul qilingan “Davlat fuqarolik xizmati to‘g‘risida”gi qonunning 13-moddasida davlat fuqarolik xizmatchisi tadbirkorlik faoliyati bilan shug‘ullanishga haqli emasligi haqidagi qoida belgilandi (mazkur qonun 2022-yil 8-noyabrda kuchga kiradi).
Bundan tashqari, Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalarida davlat xizmatchilariga tadbirkorlik faoliyati bilan shug‘ullanish taqiqlanishi hamda ushbu qoidalarning buzilishi qonunchilik hujjatlariga muvofiq intizomiy va boshqa turdagi javobgarlikka tortish uchun asos hisoblanishi ko‘rsatilgan.
Shundan kelib chiqqan holda, Korrupsiya qarshi kurashish agentligi tomonidan mazkur masalani chuqur tahlil qilgan holda, qonunbuzilishi holatlarini bartaraf qilish hamda tegishli choralar ko‘rishni so‘rab, Toshkent viloyat hokimligiga taqdimnoma kiritilgan.
2021—2022-yilning 6 oyi davomida Buxoro viloyatida 340 ta holatda 34,3 milliard so‘mlik davlat xaridlaridan 19 ta holatda tashkilot rahbari va moliyaviy masalalar bo’yicha o‘rinbosarlari, 72 ta holatda buxgalteriya xodimlari, 24 ta holatda ombor mudiri va ta’minot xodimlari, 30 ta holatda injener va texnik nazoratchilar, 20 ta holatda shartnomalarni huquqiy ekspertizasini amalga oshiruvchi yuristlar va qolgan holatda boshqa xodimlar xarid ijrochisining ta’sischisi (benefitsiari) bo‘lgan.
Shu kabi Surxondaryo viloyatida 155 ta holatda 16,1 milliard so‘mlik davlat xaridlaridan 67 ta holatda bosh hisobchi, hisobchi va iqtisodchilar, 60 ta holatda xo‘jalik va ombor mudirlari, 28 ta holatda bo‘lim boshliqlari va boshqa xodimlar xarid ijrochisining ta’sischisi (benefitsiari) bo‘lgani aniqlangan.
Masalan, Surxondaryo viloyati hokimligi Yagona buyurtmachi xizmati injiniring kompaniyasi tomonidan 2021-yilda amalga oshirilgan Termiz shahridagi 6-maktab binosini rekonstruksiya qilish bo‘yicha 8 milliard so‘mlik davlat xaridida ushbu kompaniyaning yetakchi mutaxassisi ta’sischiligidagi mas’uliyati cheklangan jamiyat bilan to‘g‘ridan to‘g‘ri shartnoma tuzilgan.
Xuddi shunday
- Samarqand viloyatida 277 ta holatda 10,9 milliard so‘mlik,
- Farg‘ona viloyatida 158 ta holatda 8,1 milliard so‘mlik,
- Sirdaryo viloyatida 20 ta holatda 1,6 milliard so‘mlik,
- Qashqadaryo viloyatida 66 ta holatda 1,1 milliard so‘mlik,
- Navoiy viloyatida 14 ta holatda 0,3 milliard so‘mlik davlat xaridlari bo‘yicha tuzilgan shartnomalarda affillanganlik va manfaatlar to‘qnashuvi holatlariga yo‘l qo‘yilgan.
Izoh (0)