O‘zbekiston qo‘shilgan qiymat solig‘ini qoplash (qaytarish)da soliq uzilishi koeffitsiyentini qo‘llash (Tax Gap) amaliyoti taqiqlandi. Bu haqda Soliq qo‘mitasi xabar berdi.
Qayd etilishicha, 2023-yil boshida QQS summasini qaytarishning asosliligi yuzasidan kameral soliq tekshiruvini o‘tkazish muddati 30 kungacha qisqartirilgan.
Shuningdek, QQS bo‘yicha maxsus ro‘yxatdan o‘tkazilganligi to‘g‘risidagi guvohnomaning amal qilishini to‘xtatib turish tartibi bekor qilindi. Avval tasdiqlangan 13 ta mezondan kamida bittasi aniqlanganda QQS guvohnomasining amal qilishi to‘xtatib turilgan.
Endilikda faqat bitta holatda amalga oshirilayotgan bitimlar xarid qilinayotgan va realizatsiya qilinayotgan tovarlar (xizmatlar) nomenklaturasiga nomuvofiq bo‘lgan holatlarda QQS guvohnomasining amal qilish muddati to‘xtatib turilishi mumkin. Qolgan barcha holatlarda QQS guvohnomasining amal qilishini to‘xtatib turish tartibi bekor qilindi.
Bundan tashqari, foyda solig‘i bo‘yicha har oy bo‘nak to‘lovlarini to‘lashi lozim bo‘lgan tadbirkorlik subyektlari daromadining chegaraviy miqdori 5 milliard so‘mdan 10 milliard so‘mga oshirildi.
Kameral soliq tekshiruvi jarayonida quyidagilar taqiqlandi:
- soliq to‘lovchining hududiga kirish;
- soliq to‘lovchining hududini va binoalrini ko‘zdan kechirish;
- soliq to‘lovchidan hujjatlarni talab qilib olish va uni chaqirtirish;
- soliq to‘lovchining hujjatlari va buyumlarini olib qo‘yish.
QQSni qoplash (qaytarishda) o‘tkaziladigan kameral soliq tekshiruvi bundan mustasno.
18-avgust kuni tadbirkorlar bilan o‘tkazilayotgan ochiq muloqotda Shavkat Mirziyoyev sodda soliq maʼmurchiligi va byurokratiyasiz qulay muhit yaratish borasida muhim tashabbuslarni ilgari surgandi. O‘tkazilgan so‘rovlarda qo‘shilgan qiymat solig‘i to‘lovchilarning 70 foizi ushbu soliqni qaytarishda soliq uzilishi koeffitsiyentini qo‘llash, yaʼni Tax Gap tizimi adolatsiz ekanini bildirgan. Soliq tizimidagi korrupsiya bilan bog‘liq shikoyatlar haddan tashqari ko‘payib ketgani ham aynan Tax Gap bilan bog‘liq.
“Olayotgan oyliklaringni oqlamayapsizlar, xalqqa, tadbirkorga yordam bermayapsizlar, to‘siq bo‘lyapsizlar. Mana, Tax Gap degan balo bularni qanday qiynayapti, korrupsiyaga sabab bo‘layotgani uchun tikka turib qarsak chalyapti”, — degandi prezident Soliq qo‘mitasi raisi Sherzod Kudbiyevga.
O‘shanda davlat rahbari 1-oktabrdan boshlab, qo‘shilgan qiymat solig‘ini qaytarishda soliq uzilishi koeffitsiyentini qo‘llash amaliyoti, yaʼni Tax Gap bekor qilinishini ma’lum qilgan edi.
Izoh (0)