Yevropa ittifoqi Rossiya va Yaqin Sharq, shuningdek, Qizil dengiz mintaqasidagi guruhlarga harbiy yuk yetkazib bergani uchun Eronga qarshi sanksiyalarni kengaytirdi.
Bu haqda Yevropa ittifoqi kengashining Bryusseldagi yig‘ilishida ma’lum qilindi.
“Ushbu qo‘shimcha chora Eronning dronlari, raketalari va tegishli texnologiyalar hamda komponentlarini yetkazib berish uchun kemalar hamda portlardan foydalanishga cheklovlar kiritishga qaratilgan”, deyiladi yig‘ilishdagi bayonotda.
Hujjatda ta’kidlanishicha, “bugungi qaror raketa va dronlarni yaratish hamda ishlab chiqarishda foydalaniladigan komponentlarni Yevropa ittifoqidan Eronga eksport qilish, uzatish, yetkazib berish yoki sotishni taqiqlaydi”.
Eronning eng yirik kemaga egalik qiluvchi kompaniyasi The Islamic Republic of Iran Shipping Line Group va uning direktorlari ham qora ro‘yxatga kiritilgan.
Avvalroq YI Rossiyani moliyaviy “qora ro‘yxat”ga qo‘shishga chaqirgandi.
“Bryusselda Rossiyani jinoiy daromadlarni legallashtirish va terrorizmni moliyalashtirish xavfi yuqori bo‘lgan davlatlar ro‘yxatiga kiritish uchun yetarli asoslar mavjud”, deya fikr bildirgan Yevroparlament deputatlari.
Yevroparlament Moskva Ukrainaga qarshi agressiv urushni Kremlga xalqaro sanksiyalarni chetlab o‘tish imkonini beruvchi korrupsion sxemalar orqali moliyalashtirayotganini ta’kidlagan. Bundan tashqari, yevropalik deputatlarning fikricha, mamlakatda davlat idoralari bilan chambarchas bog‘langan korrupsiya va uyushgan jinoyatchilik darajasi yuqori.
15-noyabr kuni Yevropa ittifoqi Rossiyaga qurol yetkazib bergani uchun Xitoyga qarshi sanksiyalar joriy qilmoqchi ekani xabar berilgandi.
Ma’lum qilinishicha, YI diplomatiyasi rahbari Josep Borrel 18-noyabrga belgilangan tashqi ishlar vazirlarining yig‘ilishidan oldin tegishli razvedka ma’lumotlari haqida Yevropa ittifoqi davlatlarini xabardor qilgan.
U taqdim etilgan dalillarni “ishonchli” deb atagan. Dalillarga ko‘ra, Rossiyaga Ukrainadagi janglarda foydalanish uchun Xitoy tomonidan qurollar yetkazib berilgan. Borrel buning uchun Xitoyni jazolashni talab qildi.
Uning so‘zlariga ko‘ra, Xitoy firmalari bilan operatsiyalarni to‘xtatish, aktivlarni muzlatish va YI mamlakatlariga kirishni taqiqlashga olib keladigan sanksiyalar ro‘yxatini yaratish zarur.
Izoh (0)