“O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi qonun 8-noyabrdan kuchga kirdi. Shu munosabat bilan Kadastr agentligi direktori Farrux Po‘latov yerga egalik huquqini olishda firibgarlarga aldanib qolmasliklari uchun fuqarolarga murojaat bilan chiqdi.
“Uzoq yillar davomida o‘zi yashab kelayotgan uyini rasmiylashtirib olishni niyat qilib yurgan halol insonlar ko‘p, ammo vaziyatdan foydalanib, noqonuniy yo‘llar bilan daromad qilishni reja qilib yurgan uddaburonlar ham yo‘q emas. Sizlarni bunday nopok kimsalarning har qanday so‘zlari va va’dalariga ishonmaslikka chaqiraman”, deyiladi murojaatda.
Uning bildirishicha, 8-noyabrdan boshlab 2024–2025-yillar uchun tasdiqlangan reja-grafik asosida mahallalarda kadastr xodimlari tomonidan xatlov ishlari boshlanadi.
“Birinchidan, mahallalar aniq tasdiqlangan reja-grafik asosida xatlovdan o‘tkaziladi. Biri qolib, ikkinchisiga o‘tilmaydi, ya’ni xalq tili bilan aytganda, tezlashtirib berishning imkoni yo‘q. Ikkinchidan, xatlovdan keyin ‘E’tirof’ dasturiga kiritilgan har bir holat bo‘yicha 15 dan ortiq vazirlik va idoralar xulosalarini beradi hamda kosmik suratlar yordamida tahlil qilinadi. Xalq tili bilan aytganda, ilojini qilib o‘tkazib bo‘lmaydi”, deydi agentlik rahbari.
Kadastr agentligi direktorining ma’lum qilishicha, xatlov jarayonida qonun bilan aniq belgilab berilgan 8 ta toifaga kiruvchi holatlar o‘rganiladi. Hozirda egallab olib, qurilish qilib qonuniylashtirib olishni reja qilayotganlar javobgarlikka tortiladi va bu ishlar ham axborot tizimlari orqali nazorat qilinadi.
“Xalq tili bilan aytganda, tanish-bilish o‘tmaydi”, deydi Farrux Po‘latov.
Agentlik rahbari har qanday holatda firibgarlik, tamagirlik yoki korrupsiya holatlariga duch kelgan fuqarolarni huquqni muhofaza qilish organlariga xabar berishga chaqirdi.
“O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi qonun Qonunchilik palatasi tomonidan 9-aprelda qabul qilinib, Senat tomonidan 21-iyunda ma’qullangandi. Prezident 5-avgust kuni ushbu qonunni imzolagandi.
Qonunga ko‘ra, fuqarolar quyidagi ko‘chmas mulklarni o‘z nomiga (ijara va mulk huquqi asosida) qonuniy o‘tkazib olishi mumkin:
- 2018-yil 1-may kunigacha yakka tartibdagi uy-joy qurib o‘zboshimchalik bilan egallagan yer hamda undagi bino va inshootlar;
- 2018-yil 1-may kunigacha fuqarolar va tashkilotlar tomonidan hujjatda ko‘rsatilgan maydondan ortiqcha egallangan yer hamda undagi bino va inshootlar;
- “bir martalik aksiya” doirasida huquqlarni eʼtirof etish oxiriga yetmagan yer hamda undagi bino va inshootlar;
- 2021-yil 8-iyunga (hokimlarning vakolati bekor qilinguniga) qadar tuman (shahar) hokimlari qarori bilan ajratilgan, lekin viloyat hokimi yoki Xalq deputatlari kengashi tomonidan tasdiqlanmagan yer;
- bog‘dorchilik va uzumchilik shirkatlari hududidagi turar joylar hamda ular egallagan yer;
- kichik sanoat zonalari hududiga 2020-yil 9-martgacha joylashtirilgan tadbirkorlarning yeri;
- davlat orderi bilan xususiylashtirilgan binolar va uylar egallagan yer;
- hokim qarori bilan mulk huquqi eʼtirof etilgan binolar va uylar egallagan yer uchastkasi.
Avvalroq o‘zboshimchalik bilan egallangan yer uchastkalarini rasmiylashtirish uchun to‘lov miqdori ma’lum qilingandi.
Izoh (1)
1978 йил дадамга колхоз Уй бирган т хозирда дадам утиб кетган 3 йил булди лекин соликлар дадамни номида мен яшаяпман узимнинг номимга кадастр кисам буладими