Xitoy Tashqi ishlar vazirligi mamlakat mudofaa vaziri Dun Szyun korrupsiyada gumon qilinib, unga nisbatan tergov o‘tkazilayotgani haqidagi xabarlarni asossiz deb atadi. Bu haqda avvalroq Financial Times (FT) nomi oshkor etilmagan rasmiylarga tayanib xabar bergan edi.
Xitoy Tashqi ishlar vazirligi matbuot kotibi Mao Ningning aytishicha, tergov haqidagi xabarlar “soya ortidan quvishdir”. Uning so'zlarini South China Morning Post nashri keltirgan.
Financial Times nashri ismi oshkor etilmagan manbaga tayanib Dun Szyun Xitoy armiyasidagi korrupsiya ishi doirasida tergov qilinayotganini xabar bergandi. Mudofaa vaziri sifatida ishlagan avvalgi ikki amaldor ham xuddi shunday jinoyatda ayblangan.
Dun Szyun 2023-yil dekabridan buyon Xitoy mudofaa vazirligini boshqarib kelmoqda. Ilgari bu lavozimni egallab kelgan Li Shangfu bor-yo‘g‘i yetti oylik faoliyatidan so‘ng ishdan bo‘shatilgandi.
Iyun oyida Xitoy Kommunistik partiyasi markaziy qo‘mitasi Siyosiy byurosi Li Shanfuni o‘z mansab mavqeidan shaxsiy manfaati yo‘lida foydalanib, pora olganlikda ayblab, uni partiyadan chiqarib yuborgan edi. Undan avvalgi mudofaa vaziri Vey Fenxe ham qonun va partiya intizomini buzgani uchun Xitoy Kommunistik partiyasidan chiqarib yuborilgan.
Avvalroq Xitoyda kriptovalyutada pora olgan amaldor — Qimmatli qog‘ozlarni tartibga solish qo‘mitasining Fan va texnologiya nazorati departamentining direktori Yao Tsyan kommunistik partiyadan o‘chirilgani xabar qilingan.
“Yao Tsyan asl missiyasidan yuz o‘girgan, havoyi shon-shuhratga intilgan, o‘zini moliyaviy texnologiyalar sohasida mutaxassis deb hisoblagan va shaxsiy manfaatlar uchun maʼlum xizmat ko‘rsatuvchi provayderlarni qo‘llab-quvvatlagan”, deyiladi Kommunistik partiya eʼlon qilgan bayonotda.
Izoh (0)